ОБСЕ е на работ на бездна, рече Лавров, некои делегации си заминаа кога почна да зборува

Шефот на руската дипломатија Сергеј Лавров денеска во Скопје, во обраќањето на министерскиот совет на ОБСЕ, изјави дека ова што моментално се случува во организацијата не е вистинскиот начин на кој треба да се третираат европските безбедносни прашања. Тој пред учесниците на советот истакна дека западните престолнини постапуваат така што го поткопуваат работењето на ОБСЕ. 

„Поделбите на континентот ги поткопуваат безбедноста што ја креира ОБСЕ и доблесната идеја на која почива процесот од Хелсинки“, рече шефот на руската дипломатија.  

Тој изјави дека, традиционално, овие состаноци завршуваат со позитивни и охрабрувачки пораки, но, според него, во моментов нема простор за оптимизам. ОБСЕ, според рускиот министер за надворешни работи, е претворена во организација што им служи на интересите на НАТО и на ЕУ и се поставува прашањето дали е мудро таа да биде витализирана. 

Според Лавров, сегашните случувања го доведуваат во прашање и функционирањето на ОБСЕ како форум за објективно решавање на глобалните проблеми и го поткопуваат принципот на еднакви права на сите учесници.

Во долгиот говор на министерскиот совет, Лавров рече дека сега има повеќе прашања отколку одговори, како и дека во моментов на глобално ниво не постои баланс на интересите, но напомена дека во меѓувреме животот не запира.

Тој се осврна на повеќе случувања во минатото, нагласувајќи дека земјите од НАТО и од ЕУ ја уништиле воено-политичката димензија на ОБСЕ. Лавров истакна дека во 1999 година, НАТО извршило брутална агресија врз Југославија, членка на ОБСЕ, а ги спомена и, како што рече, одземањето на Косово од Србија и прекршувањето на Резолуцијата 1244 на Советот за безбедност на Обединети нации.

„Во тој поглед, со жалење можеме да кажеме дека ОБСЕ ја дочекува оваа годишнина во жална состојба, а нејзините перспективи се нејасни“, рече рускиот министер, осврнувајќи се на 50-годишнината од организацијата.

Лавров говореше и за другите прашања што ја засегаат Русија, а за кои кажа дека се поттикнати од западната политика, Грузија, Јужна Осетија, Приднестровие, Молдавија, Донбас, Украина, а ги спомена и санкциите што Западот ги воведе кон Русија, кои ги означи како обид да ја урнат руската економија.

Според Лавров, Молдавија е следната жртва во хибридната војна на Западот против Русија.

Рускиот министер за надворешни работи веднаш по завршувањето на говорот ја напушти салата во која се одржува советот. Неговото обраќање беше бојкотирано од дел од делегациите, кои станаа и ја напуштија конференциската сала веднаш откако претседавачот со ОБСЕ, Бујар Османи, го најави обраќањето на шефот на руската дипломатија.

Лавров на маргините на министерскиот совет на ОБСЕ во Скопје имаше билатерални средби со шефовите на дипломатиите на Ерменија и на Унгарија, Арарат Мирзојан и Петер Сијарто. Сергеј Лавров имаше и патемна средба со шефот на австриската дипломатија Александер Шаленберг.

Портпаролката на Министерството за надворешни работи на Русиjа, Мариjа Захарова, на социјалната мрежа Телеграм објави дека на масите во салата за состаноци на Советот на министри за надворешни работи на ОБСЕ има јасна манифестација на она за што зборувал Сергеј Лавров во својот говор: „Под притисок на САД, логиката на ОБСЕ се заменува со агресивната идеологија на НАТО“.

Дачиќ: Потребна е мудрост и политичка волја за да ги надминеме предизвиците со кои се соочува ОБСЕ

Потребна е мудрост и политичка волја за да ги надминеме предизвиците со кои се соочува ОБСЕ, порача српскиот министер за надворешни работи Ивица Дачиќ во обраќањето на Министерскиот совет на Организацијата во Скопје.

Дачиќ нагласи дека војната во Украина довела до деградација на довербата, а ОБСЕ се соочила со најголемите проблеми досега поради неможноста да се постигне консензус за клучните прашања за нејзиното функционирање.

-Уверен сум ќе направиме исчекор и ќе покажеме дека сме една од ретките мешовити организации, која е способна успешно да се соочи со сите предизвици, рече Дачиќ. 

Нагласи дека Србија останува посветена на таа цел и оти ќе остане конструктивен партнер, кој ќе пружа зајакнување на капацитетот на ОБСЕ.

Тој во својот говор се осврна и на Косово, велејќи дека положбата на Србите таму, никогаш не била потешка. Додаде дека тие се соочуваат со различни видови дискриминација и неизвесност,  а како проблеми ги наведе правото на гласање и учеството на парламентарните избори во Србија.

 

Во моментов нема коментари за веста. Биди прв да коментира...

Остави коментар