Лидерите на земјите членки на ЕУ донесоа одлука за старт на преговори за членство со Украина и Молдавија, објави претседателот на Европскиот совет, Шарл Мишел на платформата Х.
„Европскиот совет одлучи да отвори пристапни преговори со Украина и Молдавија“, наведе Мишел во објавата.
Според него, Советот на ЕУ решил и да и додели статус на земја кандидат за членство на Грузија, додека во однос на БиХ останува условната препорака за старт на преговорите.
„ЕУ ќе ги отвори преговорите со Босна и Херцеговина, откако ќе се постигне потребниот степен на усогласеност со критериумите за членство и ја повикува Комисијата да поднесе извештај до март со цел да се донесе таква одлука“, додаде Мишел во објавата.
Според него, ваквите одлуки се јасен сигнал за надеж за народите на овие земји и за европскиот континент.
По објавата на Мишел, на платформата Х се огласи и украинскиот претседател Володимир Зеленски кој напиша дека ваквата одлука е победа за Украина. „Ова е победа за Украина. Победа за цела Европа. Победа која мотивира, инспирира и зајакнува“ пишува Зеленски.
За претседателката на Европската Комисија, Урсула фон дер Лајен ова е стратешка одлука и ден кој ќе остане врежан во историјата на нашата Унија.„Горди сме што ги исполнивме нашите ветувања и се радувавме за нашите партнери“ стои во објавата на Х.
Унгарскиот премиер Виктор Орбан се спротивстави на отворањето на преговорите со Украина и не беше во просторијата кога се гласаше. За одлуката е потребна едногласна поддршка, а никој не се спротивстави на гласањето, велат изворите, кои навеле дека Орбан си заминал.
Одлуката за Украина засега е симболична бидејќи формалната преговарачка рамка нема да биде претставена пред март, кога од Украина се бара да исполни одредени дополнителни услови.
Во меѓувреме, Киев мора да усвои закони за малцинствата и корупцијата и да ги регулира активностите на лобирање на начин што го бараат европските стандарди.
.webp){kind=icon}