.webp){kind=icon}
Рускиот милијардер Роман Абрамович го загуби спорот против одлуката на Европската Унија да ги замрзне неговите средства и да му забрани да патува во 27-члениот блок поради неговите наводни врски со претседателот Владимир Путин.
ЕУ „не погреши во својата процена“ со вклучување и задржување на Абрамович на списокот со санкции, пресуди Општиот суд на блокот во Луксембург во средата. Исто така го отфрли барањето за компензација од бизнисменот, бидејќи тој не успеа да ја собори одлуката на ЕУ во однос на санкциите.
Абрамович е еден од најбогатите луѓе во Русија, кој со своите партнери собра 13 милијарди долари од продажбата на нафтената компанија „Сибнефт“ на државниот „Газпром“ во 2005 година. Минатата година тој беше принуден да го продаде лондонскиот фудбалски тим Челзи за 4,25 милијарди фунти откако беше санкциониран од Британија - завршувајќи го речиси дведецениското сопствеништво. ЕУ се надоврза со свои санкции неколку дена подоцна.
Судиите на ЕУ во средата исто така ги отфрлија тврдењата на Абрамович за „несразмерно прекршување“ на неговата слобода за непречено движење низ ЕУ како португалски државјанин.
Блокот санкционираше речиси 1.800 луѓе и ентитети од почетокот на руските напади врз Украина, почнувајќи со анексијата на Крим во 2014 година, проследена со инвазијата на земјата во февруари минатата година. Жалбите во однос на санкциите може да траат со години, но ретко резултираат со трајна победа. Поранешниот украински претседател Виктор Јанукович и неговиот син остануваат на листата на санкции на ЕУ од 2014 година, дури и откако добија неколку судски жалби.
