Досегашниот премиер Димитар Ковачевски му ја предаде функцијата на претседателот на техничката влада Талат Џафери.
„Денеска го реализиравме примопредавањето на функцијата претседател на Владата на РСМ во согласност со законските обврски за организирање техничка влада, чија основна задача е да организира и спроведе слободни, демократски и фер претседателски и парламентарни избори. Сите започнати политики треба целосно и континуирано да се реализираат. Очекувам посветеност во работата, концентрација на сите во Владата и, во таа насока, сметам дека работата ќе биде на највисоко ниво“, порача Ковачевски.
Приоритет на оваа техничка влада е одржување на редовните претседателски и парламентарни избори на фер и демократски начин. Покрај изборите, новиот мандатар Талат Џафери се обврзува на продолжување на усвоените политики на претходната влада на премиерот Димитар Ковачевски.
МИА
„Со господинот Ковачевски се согласивме за примарните прашања што ќе бидат во фокус на владата што јас ќе ја предводам. Изразив задоволство за одговорноста и должноста повторувајќи го тоа што го кажав во моето експозе во Собранието односно Уставот и законите ќе бидат основа врз која ќе ги базирам секоја постапка и одлука што ќе ја донесеме како влада.“
Со 65 гласа „за“ и три „против“, Собранието во текот на вчерашниот ден ја изгласа техничката влада, по речиси двочасовна пленарна дискусија. На посебна седница се констатираа и заменик-министрите, како и дополнителните заменик-министри. ВМРО-ДПМНЕ не гласаше за изборот на влада, иако доби двајца министри – за внатрешни работи и за труд и социјална политика. До формирањето нова влада до крајот на јуни, земјата ќе ја води техничка влада. Парламентарни избори во земјава ќе се одржат на 8 мај, а претседателски избори на 24 април.
.webp){kind=icon}