Во победничкиот говор, Путин вети дека ќе ја продолжи војната во Украина

Рускиот претседател Владимир Путин вети дека ќе ја продолжи војната против Украина и ќе ги зајакне руските вооружени сили за време на новиот претседателски мандат. Тој исто така се закани дека ќе ги третира „предавниците“ од волонтерски формации „како да се во воена зона“.

Во говорот во изборниот штаб, Путин рече дека високиот одзив на изборите е последица на драматичните настани низ кои поминува земјата.

„Ние сме принудени буквално да ги браниме интересите на нашите граѓани со оружје в раце“, рече Путин, мислејќи на оружената агресија против Украина, која тој ја почна пред повеќе од две години.

Зборувајќи за предизвиците на неговиот нов мандат, рускиот претседател истакна дека е неопходно да се решат задачите на специјалната воена операција (како што Русите ја нарекуваат војната во Украина) и да се зајакнат одбранбените капацитети и вооружените сили.

Тој исто така рече дека на сите агенции за спроведување на законот ќе им биде наложено да го разоткријат секој што се бори против Русија со оружје.

Според Путин, претставниците на Рускиот волонтерски корпус „се фрлаат како топовско месо во мелница за месо на државната граница“. Тој го спореди РВЦ со војската на Власов (Руси што се бореле на страната на Германците во Втората светска војна) и тврди дека од 1.500 доброволци, „околу 800 луѓе биле убиени“. Оваа групација, составена од Руси, се бори на страната на Украина против руската инвазија од самиот почеток и неодамна тие ја презедоа одговорноста за упади на руска територија.

Путин нагласи и дека во Русија нема смртна казна, но „ќе се однесуваме со предавниците како да се во воена зона“.

Шефот на Кремљ исто така рече дека Русија „е за мировни преговори, но само доколку тоа не е затоа што на непријателот му снемува муниција“.

Тој изјави и дека Русија во одреден момент би можела да создаде „санитарна зона“ (тампон-зона) на територијата на Украина. Тој тврди дека ќе биде толку длабока што средствата за уништување, пред сè од странско производство, тешко ќе ја надминат.

Во моментов нема коментари за веста. Биди прв да коментира...

Остави коментар