По пребројани над 99 отсто од гласовите, јасно е дека Хрватска во наредните денови ќе се соочи со интензивна политичка борба бидејќи ниту една партија или коалиција не добила доволно гласови за формирање влада, а не е исклучено и повторување на изборите.
Според последните официјални податоци, Хрватската демократска заедница (ХДЗ) и партнерите освоиле 60 мандати, Социјалдемократската партија на Хрватска (СДП) и партнерите освоиле 42 мандата, Татковинско движење (Домовински покрет - ДП) и партнерите освоиле 14 мандати, Мост и партнерите освоиле 11, Можеме и коалицијата 10, а прагот го поминале и Истарски демократски сабор (ИДС) со коалицијата (три мандати), Независната платформа на Северот (два мандата) и Фокус и Република (еден мандат).
Прочитајте повеќе: Во Хрватска се одржуваат парламентарни избори
Од хрватската опозиција повикаа на обединување за да се собори ХДЗ, но многу потешко е да се замисли влада во која ќе се помират разликите на левицата и десницата отколку сценарио каде што ХДЗ, преку соработка со Татковинско движење и малцинските партии, ќе успее да дојде до потребните 76 мандати. Засега сите се колнат дека ќе се држат до своите принципи, но кога ќе почнат преговорите, прашање е колку брзо некои од новоизбраните пратеници ќе омекнат по прашањето на идеологијата и ќе се насочат кон прагматизам.
Иван Пенава од ДП вели дека нема да влезе во коалиција со СДСС и Можеме, а ќе разговара со СДП и ХДЗ. Повеќето, пак, велат дека нема да одат со ХДЗ и Можеме. Сандра Бенчиќ од Можеме повикува на обединување за уривање на ХДЗ, а од овој мотив се води и Давор Наѓи од Фокус.
На гласање излегле околу 62 отсто од гласачите.
.webp){kind=icon}
