Првични резултати: ВМРО-ДПМНЕ води на изборите, тесна трка во албанскиот блок

Првичните резултати од денешните парламентарни избори што Државната изборна комисија ги објавува на својата веб-страница покажуваат дека од обработени 59,99 проценти од избирачките места, коалицијата Твоја Македонија на ВМРО-ДПМНЕ има освоено 217.533 гласа (40,04 проценти), Европски фронт на ДУИ има 90.151 глас (16,59 проценти), Коалицијата за европска иднина предводена од СДСМ 73.922 гласа (13,61 проценти), а коалицијата од албанскиот опозициски блок Вреди и,а 73.893 гласа (13,60 проценти).

Левица има 35.615 гласа (6,56 проценти), движењето ЗНАМ – За наша Македонија има 26.494 гласа (4,88 проценти). Другите партии и коалиции што учествуваа на изборите имаат под еден процент од гласовите.

Право на глас на парламентарните избори имаа 1.815.350 граѓани запишани во избирачкиот список.

Се гласаше во согласност со пропорционалниот модел во шест изборни единици. Гласање за парламентарните избори во дијаспората не се спроведе бидејќи немаше доволен број пријавени наши државјани.

Во првата изборна единица има 313.183 гласачи, во втората 321.087, во третата 275.034, во четвртата 278.721, во петтата 310.216 и во шестата изборна единица 317.109 гласачи.

 

Во моментов нема коментари за веста. Биди прв да коментира...

Остави коментар