Најмалку 12 мртви во напад од Либан врз село на Голанската висорамнина

Дванаесет деца загинаа, а повеќе од 20 се повредени во ракетен напад на Голанската висорамнина заземена од Израел, што ја зголеми загриженоста од ескалација на борбите меѓу Израел и милитантната група Хезболах со седиште во Либан.

Израелската војска соопшти дека нападот во саботата врз Мајдал Шамс бил извршен од Хезболах, кој е поддржан од Иран. Тоа беше најсмртоносниот напад врз израелски цивили од инвазијата на Хамас на 7 октомври што ја започна војната во Појасот Газа и доведе до редовна размена на оган меѓу Хезболах и Израел.

„Израел нема да го игнорира убиствениот напад“, рече премиерот Бенјамин Нетанјаху. „Хезболах ќе плати висока цена“.

Израелскиот премиер треба да се врати од САД во недела попладне и веднаш по пристигнувањето ќе свика состанок на неговиот кабинет за безбедност, соопшти неговата служба.

Сцени по нападот врз Мајдал Шамс МИА

Проектилот користен во нападот во саботата бил иранска ракета Фалак 1 со боева глава од 50 килограми, изјави портпаролот на израелските одбранбени сили Даниел Хагари. Моделот „е исклучиво во сопственост на Хезболах“, додаде тој.

Според израелските служби за итни случаи, тој погодил фудбалско игралиште исполнето претежно со деца и младинци на возраст од 10 до 20 години.

Хезболах негираше дека е одговорен, што Хагари го нарече „лага“, тврдејќи дека шиитската група има „директна одговорност за смртта на невините деца“.

Посетувајќи го местото на настанот во Мајдал Шамс, израелскиот министер за одбрана Јоав Галант рече дека Хезболах „ќе ја плати цената“ за нападот.

Израелските одбранбени сили соопштија дека во текот на ноќта извршиле напад врз Хезболах, на територијата на Либан, како одговор на претходниот ракетен напад.

„Во текот на ноќта израелските воздухопловни сили нападнаа голем број терористички цели на Хезболах длабоко на територијата на Либан, во јужната област, вклучувајќи складишта за оружје и терористичка инфраструктура. Нападнати беа цели во областите Чабриха, Борџ Ел Чмали и Бекуа, Кфаркела, Раб Ел Талатин, Киам и Таир Харпа“, соопшти израелската армија.

Инаку, израелската војска во последните месеци речиси секојдневно ги напаѓа локациите и борците на Хезболах во Либан.

 

 

- Ажурирано со информацијата за возвратниот напад на израелската војска