Харис собра 310 милиони долари во јули надминувајќи го Трамп во трката за пари

Американската потпретседателка Камала Харис собра рекордни 310 милиони долари во јули, според нејзиниот штаб, со што кандидатката на демократите доби парична предност пред републиканецот Доналд Трамп.

Резултатот на Харис, кој вклучува пари собрани за нејзината кампања, Демократскиот национален комитет и државните партии, е двојно поголем од износот од 138,7 милиони долари што Трамп, номинираниот од Републиканската партија, ги собра во јули. Таа го започна август со 377 милиони долари готовина, што е најголем износ во еден изборен циклус и повеќе од 327 милиони долари што Трамп ги има во банка.

Претставниците на Харис соопштија дека јули бил „најдобриот месец за собирање средства од обичниот народ во претседателската историја“.

Овој прилив на пари покажува како Харис, која влезе во трката дури на 21 јули по одлуката на претседателот Џо Бајден да стави крај на кандидатурата за реизбор, ги поттикна демократските гласачи и донаторите брзо да се здружат зад новиот знаменосец. Бајден забележа замрзнување на донациите кон крајот на неговата кампања, при што донаторите беа вознемирени од катастрофалниот дебатен настап на актуелниот претседател.

Новите бројки укажуваат на загрижувачки развој на кампањата на Трамп, која забележа пораст во прибирањето финансиски средства во вториот квартал успевајќи да ја избрише огромната предност на Бајден. Поранешниот републикански претседател го започна јули со 45 милиони долари повеќе готовина од Бајден.

Билансот на Харис вклучува 200 милиони долари што таа ги собра во неделата откако Бајден ја заврши кандидатурата и доби поддршка за номинација од демократите.

Донаторите кои дале помалку од 200 американски долари сочинуваат 94 проценти од 4,2 милиони примени донации, велат од штабот на Харис. Од три милиони поединци кои донирале, два милиони донирале прв пат, а 60 проценти биле жени. Коалиционите групи, вклучително и црните жени за Харис и Латините за Харис, собрале 20 милиони долари.

Харис се обидува да стане првата црномуреста жена претседател во историјата на САД.

„Огромниот излив на поддршка што го видовме за само кратко време јасно покажува дека коалицијата за Харис е мобилизирана“, рече менаџерката на кампањата на Харис, Џули Чавез Родригез.

Харис доби поддршка од некои истакнати големи демократски донатори. Менаџерот на хеџ фондот Џорџ Сорос ја сигнализираше својата поддршка набргу откако Бајден ја поддржа, како и партиските поддржувачи од Волстрит и од Холивуд. Милијардерите Марк Кубан, Рид Хофман и Винод Косла беа меѓу повеќе од 200 капиталисти кои јавно ја поддржаа нејзината кампања.

Кампањата потроши многу на медиуми и ресурси во пресрет на гласањето во ноември. Има повеќе од 260 канцеларии во кои работат повеќе од 1.400 луѓе. Кампањата, исто така, троши 50 милиони долари за платени медиуми пред Демократската национална конвенција што започнува во Чикаго на 19 август. Повеќе од 170.000 нови волонтери се приклучија на кампањата, која одржа 2.300 настани за мобилизирање приврзаници минатиот викенд.

 

Во моментов нема коментари за веста. Биди прв да коментира...

Остави коментар