Иран вели дека ќе го казни Израел, но сака да избегне тотална војна

Иран сигнализираше дека сака да избегне целосна војна со Израел, иако се закани дека ќе се одмазди за минатонеделниот атентат на еден од главните луѓе на Хамас, кој се случи во главниот град на исламската република. 

Техеран, кој веќе вети одмазда за убиството на Исмаил Ханија, рече дека има цел да го одврати Израел од повторување слични потези. Израел ниту потврди ниту негира дека стои зад нападот.

„Зајакнувањето на стабилноста и безбедноста во регионот ќе се постигне со казнување на агресорот и создавање отпор против Израел и неговиот авантуризам“, изјави за новинарите портпаролот на иранското министерство за надворешни работи  во понеделникот во Техеран.

Исламската република има право, во рамките на меѓународното право, да го казни Израел, но не сака да ги ескалира тензиите на Блискиот Исток, изјави портпаролот Насер Канаани.

Израелскиот шекел падна шести ден во понеделникот на околу 3,82 за долар, што е најслабо ниво на затворање од ноември. Израелските акции се стабилизираа по најновите коментари од Иран, но сè уште се во силен пад во последните три тргувања. Дел од падот на шекелот и акциите може да се должи на денешниот пад на светските берзи.

Израел е во „војна на повеќе фронта против иранската оска на злото“, изјави во неделата премиерот Бенјамин Нетанјаху. „Го удираме секој нејзин крак со голема сила. Подготвени сме за секое сценарио – и офанзивно и дефанзивно“.

САД, кои преместуваат ескадрила на борбени авиони во регионот и држат носач на авиони во близината за да му помогнат на Израел, го притискаат Нетанјаху да ги зголеми напорите за постигнување договор за прекин на огнот со Хамас во однос на нивната војна во Газа. САД и арапските држави веруваат дека прекинот на борбите на палестинска територија ќе го смири регионот.

Министрите за надворешни работи на Групата седум (Г7) во неделата зборуваа за ризиците од регионална војна. Американскиот државен секретар Ентони Блинкен рече дека има „итна потреба од деескалација“.

Блинкен им рекол на своите колеги од Г7 дека нападот врз Израел од Иран и Хезболах може да започне уште в понеделник, објави „Аксиос“ (Axios).

Ханијa беше убиен само неколку часа по смртоносен воздушен напад во Бејрут против Фуад Шукир, висок командант на Хезболах. Израел соопшти дека е одговорен за таа акција и го обвини Шукир за организирање на ракетниот напад врз Голанската Висорамнина под контрола на Израел, во кој загинаа 12 деца и тинејџери додека играа фудбал.

Хезболах, кој разменува оган со Израел преку либанската граница од почетокот на војната во Газа во октомври, исто така се закани дека ќе возврати на еврејската држава. Шиитската група може да дејствува во координација со Иран, нејзиниот спонзор.

Во моментов нема коментари за веста. Биди прв да коментира...

Остави коментар