.webp){kind=icon}
Претседателот на Србија, Александар Вучиќ, изјави дека во следните десет дена Белград ќе продолжи да бара компактно решение за десетици илјади Срби на Косово во врска со регистарските таблички и документите, чие спроведување Приштина го најави за 1 септември.
Барањето на Косово припадниците на српското малцинство да усвојат документи кои ги издава владата во Приштина, предизвика тензии долж границата минатиот месец.
Ова разгорување ја поттикна Европската унија да одржи разговори меѓу српскиот претседател, Александар Вучиќ и косовскиот премиер, Албин Курти. Двајцата се состанаа во Брисел минатата недела, но не постигнаа видлив напредок.
„Немаме друг избор освен да ги зачуваме мирот, стабилноста и безбедноста“, изјави Вучиќ за новинарите во Белград. Тој ја обвини владата на Курти дека го вознемирува српското малцинство со цел да ги протера, но рече дека гарантира оти нема да има бегалски колони и дека ќе спречи каков било погром.
На Косово живеат нешто повеќе од 100.000 Срби, од околу 1,8 милиони жители, откако повеќе од 200.000 избегаа по војната во 1998-1999 година.
Косово прогласи независност во 2008 година, но повеќето од преостанатите Срби остануваат лојални на Србија, која одбива да ја прифати независноста на Косово.
НАТО има мировни сили во Косово од војната, кои сега бројат околу 3.800 војници. Вучиќ го повтори апелот косовските сили предводени од НАТО (КФОР) да спречат какво било насилство.
Косово и Србија се стремат да влезат во ЕУ, но мора да ги поправат односите за да се квалификуваат за членство. Разговорите со посредство на блокот траат повеќе од една деценија и постигнаа мал напредок.
Србија инсистира на одредена автономија за Србите во Косово, додека Косово бара Белград прво да ја признае независноста.
