Според последниот извештај на Светскиот економски форум, ризикот од фрагментација на светската економија (деглобализација) е еден од трите најголеми глобални ризици, заедно со кризата на трошоците на животот и климатските ризици. Процесот на деглобализација може особено неповолно да дејствува на малите економии, кои по својата природа се повеќе зависни од надворешна трговија и пристап до надворешно финансирање.
Ова беше дел од дискусијата на гувернерката на Народната банка, Анита Ангеловска-Бежоска, на тркалезната маса што ја водеше директорката на ММФ, Кристалина Георгиева, во рамките на конференцијата насловена „Водење политики во немирни води: Јакнење на отпорноста на Централна, Источна и Југоисточна Европа“, во организација на Хрватската народна банка (ХНБ) и Меѓународниот монетарен фонд (ММФ), која се одржува во Дубровник.
Конференцијата ја отвори директорката на ММФ, Кристалина Георгиева, заедно со хрватскиот премиер Андреј Пленковиќ и со гувернерот на Хрватската народна банка, Борис Вујчиќ.
„Пандемијата и последиците од војната во Украина се еден од најголемите стрес-тестови на повеќедеценискиот процес на глобализација. Според некои оцени, процесот на глобализација во изминатите четири децении овозможи зголемување на глобалниот доход за околу 10 отсто во изминатата декада. Деглобализацијата е особен ризик за земјите од регионот, кај кои поради евентуалното намалување на трговските текови, како и на тековите на капитал, труд и технолошки иновации, може значително да се намалат потенцијалот за раст и реалната конвергенција“, посочи гувернерката во своето излагање.
Како што е наведено во соопштението од Народната банка, во овие економии во изминатите две декади, трговската интеграција значително се зголеми, достигнувајќи 113 отсто од БДП, а зголемување бележат и финансиските текови, особено преку странски директни инвестиции. Сето ова овозможи пренесување финансии, знаење и технологии од поразвиените економии, а со тоа и забрзана реална конвергенција, која во просек се зголеми за околу 30 п.п. Сепак, во земјите од Западен Балкан овој процес е побавен, поради што ризикот од деглобализација е особено голем предизвик за оваа група земји.
Земјите од Западен Балкан, кои наедно и не се дел од Европската Унија, имаат пониско ниво на доход, што е само околу 40 проценти од доходот на ЕУ, а поголеми потреби за инвестиции во инфраструктура. Ваквите состојби, како и новите предизвици што ги донесе енергетската криза и потребата за поголема дигитализација, уште повеќе ја истакнуваат улогата на глобализацијата во развојот на овие економии. Оттука, неопходно е да им се посвети поголемо внимание на структурните реформи со кои ќе се намали ранливоста на овие економии и ќе се зголеми нивната отпорност на шокови, а наедно ќе се подигне и нивниот потенцијал за раст. Меѓународните институции можат да го поддржат овој процес преку дополнително финансирање, а особено за земјите што не се членки на ЕУ и немаат пристап до европските структурни фондови.
Конференцијата на која учествуваше гувернерката е од висок профил и традиционално ги обединува гувернерите на централните банки, како и министрите за финансии од регионот на ЦИЈЕ и високи претставници на меѓународни финансиски организации.
.webp){kind=icon}
