Турбулентен и крајно неизвесен викенд ја потресе геополитичката и пазарната сцена, откако уште пред да почнат пропаднаа обидите за втора рунда мировни преговори меѓу САД и Иран што требаше да се одржат во Исламабад. Американскиот претседател Доналд Трамп во последен момент ги повлече своите претставници Стив Виткоф и Џеред Кушнер, кои воопшто не отпатуваа за Пакистан, оценувајќи дека Техеран „понудил многу, но недоволно“.
Викендот го одбележа и вооружениот напад на еден од најпрестижните настани во Вашингтон – традиционалната гала вечера на дописниците од Белата куќа. Инцидентот предизвика итна евакуација на Трамп, Меланија Трамп, високи функционери и стотици гости, додека Тајната служба интервенирала за неколку секунди.
Полицијата осомничениот го идентификува како Кол Томас Ален, 31-годишник од Торенс, предградие на Лос Анџелес, Калифорнија. Тој в понеделник ќе биде изведен пред суд по обвиненија за употреба на огнено оружје и напад врз сојузен агент со опасно оружје. Според американските власти, Ален признал дека цел му биле функционери од администрацијата на Трамп, но не прецизирал кои.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
Три сценарија за влијанието на војната врз автомобилската индустрија, засегната и Македонија
Глобалната продажба на лесни возила во текот на 2026 година ќе биде помала за 800.000 до 900.000 единици, а во 2027 година за 500.000 единици, стои во прелиминарните прогнози на „Стандард енд пурс Глобал“. Според овој извештај, само во земјите од Заливот намалување ќе изнесува околу 200.000 единици.
Во прогнозата се наведува дека глобалниот пазар веројатно ќе доживее подлабоки прекини во синџирот на снабдување ако Ормускиот Теснец остане затворен до крајот на април.
„Нашите основни претпоставки за март 2026 беа оптимистички, очекувајќи дека сообраќајот на танкерите ќе се обнови по неколку недели и ќе биде нормализиран до крајот на март или почетокот на април. Тоа не се реализираше“, се наведува во извештајот.
Берзански преглед: Европа во црвено, раст во САД, будење на биткоинот
Преговорите во Пакистан, кои требаше да донесат потраен мир на Блискиот Исток, завршија уште пред да почнат, но примирјето засега останува. „Можат да нè повикаат кога сакаат“, изјави американскиот претседател Доналд Трамп, додавајќи дека неговите луѓе „повеќе нема да прават 18-часовни летови за да седат и да разговараат за ништо“.
Ормускиот теснец и натаму останува затворен и од САД и од Иран, додека во меѓувреме барел нафта Брент чини повеќе од 105 долари, а Вест Тексас помалку од 95 долари. Да потсетиме, уште на крајот од минатата недела Брент се тргуваше блиску до 90 долари за барел, што претставува раст од околу 15 отсто. Сепак, на крајот на март цената се доближи и до границата од 120 долари за барел.
ББА прогноза: Инфлација од 4,4 проценти во Македонија во 2026.
Моментално сме во енергетски шок поради конфликтот на Блискиот Исток, при што Европската централна банка (ЕЦБ) очекува инфлацијата на енергијата да надмине 6 проценти во 2026 година, по минус 1 процент во 2025 година.
Ова потврдува дека почетниот инфлаторен импулс повторно се пренесува првенствено преку горивото, греењето и електричната енергија, како што беше случајот за време на последниот енергетски шок во 2022 година, кога, според пресметките на ЕЦБ, за секои 10 проценти зголемување на цените на бензинот, вкупната инфлација во еврозоната се зголеми за околу 0,6 процентни поени по една година.
Со други зборови, енергијата останува главен предизвикувач на инфлацијата на краток рок. Од почетокот на годината, цените на нафтата се зголемија од околу 60 долари за барел на околу 100 долари, додека гасот се зголеми од околу 25 евра за мегават час на околу 40 евра.
Ормуски теснец: Сообраќајот е целосно запрен, блокадите остануваат цврсто на сила
Сообраќајот низ Ормускиот теснец остана речиси целосно запрен, при што ниту Иран ниту САД не покажуваат знаци на ублажување на блокадите на поморскиот сообраќај.
Мировните преговори меѓу двете страни повторно западнаа во застој откако американскиот претседател Доналд Трамп го откажа планираното патување на своите главни претставници во Исламабад, Пакистан, велејќи дека Иран „понудил многу, но недоволно“. Претседателот на Иран, Масуд Пезешкијан, изјави дека неговата земја нема да влезе во „наметнати преговори под закани или блокада“, додавајќи дека довербата нема да биде обновена „без прекин на непријателските дејства“. До неделата наутро, видливиот сообраќај што го напуштал Персискиот Залив преку Ормуз бил сведен на мал крајбрежен товарен брод, покажуваат податоците за следење бродови што ги собра „Блумберг“.
„Гугл“ планира да инвестира до 40 милијарди долари во „Антропик“
„Гугл“ (Google) ќе инвестира 10 милијарди долари во „Антропик“ (Anthropic PBC), со можни дополнителни 30 милијарди долари подоцна, зајакнувајќи го односот меѓу двете компании кои истовремено се партнери и ривали во трката за развој на вештачка интелигенција.
„Антропик“ соопшти дека „Гугл“ сега се обврзува на готовинска инвестиција од 10 милијарди долари при проценета вредност од 350 милијарди долари, исто како и вреднувањето во рундата на финансирање во февруари, без вклучување на неодамна прибраниот капитал. Компанијата во сопственост на „Алфабет“ (Alphabet Inc.) ќе инвестира уште 30 милијарди долари доколку „Антропик“ ги исполни поставените цели за резултати, соопшти стартапот во петокот, а средствата ќе поддржат значително проширување на компјутерските капацитети.
„Антропик“ го засили прибирањето капитал по големиот успех на „Клод код“ (Claude Code), ВИ агент што го забрзува процесот на пишување компјутерски софтвер.
.webp){kind=icon}
