text size
Растот на цените на нафтата и енергенсите поради војната со Иран повторно ги засили стравувањата од нов глобален енергетски шок и дополнителен инфлациски притисок врз економиите. Европските влади веќе бараат начини како да го ублажат ударот врз домаќинствата и компаниите, а Франција најави нов пакет помош од 710 милиони евра, покрај веќе обезбедените стотици милиони евра за најпогодените индустрии.
Добро утро, ви пишува Анита С. Буховски од дигиталната редакција на „Блумберг Адрија“. Во продолжение се петте вести што ги издвоиме за почеток на денот.
„Ерсте“: Шокот од Блискиот Исток го менува наративот за македонската економија
Податоците од почетокот на 2026 година укажуваат дека македонската економија го губи позитивниот замав од минатата година, кога бруто-домашниот производ се зголеми за 3,5 проценти, што беше најголем раст за четири години, забележуваат аналитичарите од австриската „Ерсте груп“ (Erste Group) во новиот извештај за макроекономските изгледи за Македонија.
Спорд нив, одлучувачки сигнал е пресвртот кај инфлацијата. Во извештајот се посочува дека индексот на трошоците на живот (CPI) скокна на 5,7 проценти во април поради влијанието на нафтениот шок од Блискиот Исток, при што дизелот порасна за речиси 40 проценти, а бензинот за околу 20 проценти помеѓу февруари и март, што е шок на реалниот доход за потрошувачкиот мотор што ја носеше 2025 година.
ЕК: Продолжен конфликт на Блискиот Исток носи поголем ризик за македонскиот долг
Конфликтот на Блискиот Исток значително ја промени глобалната економска слика, стои во пролетната прогноза на Европската комисија. Пред почетокот на војната со Иран, глобалната економија земаше замав. Притисокот што го создаваа царинските политики на Трамп беше амортизиран од намалувањето на инфлацијата и силниот инвестициски циклус поврзан со развојот на вештачката интелигенција.
Но, од крајот на февруари светот влезе во едно од најголемите глобални енергетски нарушувања во поновата историја. Ова нарушување доаѓа само четири години по енергетскиот шок предизвикан од агресијата на Русија врз Украина.
Ќе воведат ли Иран и Оман заеднички такси во Ормускиот теснец?
Иран разговара со Оман за воспоставување некаков вид постојан систем на такси, со кој формално би се регулирала неговата контрола врз поморскиот сообраќај низ Ормускиот теснец.
„Иран и Оман мора да ги мобилизираат сите свои ресурси и за обезбедување безбедносни услуги и за управување со пловидбата на најсоодветен начин“, изјави во средата во Париз, во интервју за „Блумберг“, иранскиот амбасадор во Франција, Мохамад Амин-Неџад.
Шефот на „Голдман“ директно му се обрати на Маск — сака да го води ИПО-то на „Спејс Икс“
Додека „Голдман Сакс“ (Goldman Sachs Group) ја водел кампањата за преземање на водечката улога во иницијалната јавна понуда на „Спејс Икс“ (SpaceX), извршниот директор на банката Дејвид Соломон отворил нов канал за комуникација со милијардерот и сопственик на ракетната компанија, испраќајќи му директна порака на Илон Маск.
Додека банките се натпреварувале која ќе ја добие водечката улога во ова ИПО, Соломон со својот тим директно му испратил порака на Маск преку мрежата Икс, велат анонимни извори.
Од тивок отказ до токсична продуктивност - еве го бизнис-речникот на генерацијата зед
Секоја генерација има свој однос кон работата - и сленг што оди со тоа. Бебибумерите го измислија воркохолизмот, а трката со стаорци беше нивна реалност, заедно со искачувањето по корпоративната скала и лојалноста кон компанијата. Сепак, не е сè црно-бело - тука се и термини како „голдбрикинг“, кога се преправате дека многу работите, а всушност ретко што завршувате.
Милениумците дојдоа со поинаков речник: „хасл култура“, „сајд хасл“ и „економија на страста“. Од тоа, неизбежно, произлезе и прегорувањето - термин што Светската здравствена организација во 2019 година официјално го вклучи во Меѓународната класификација на болести. Генерацијата зед веќе создаде целосно нов речник и го популаризира преку Тикток. Еве што треба да знаете.
.webp){kind=icon}
