Сѐ што треба да знаете за годишниот одмор - пет вести на денот

Топлотен бран се шири низ Европа, а сѐ пожешко станува и на Светското првентство што се одржува во САД, Канада и Мексико. Гледаме возбудливи мечеви, доста голови, а паѓаат и светски рекорди. Лионел Меси, аргентиската ѕвезда во понеделник, 22 јуни, се запиша во историјата станувајќи најдобриот стрелец на светските првенства, со постигнувањето на своите 17-ти и 18-ти гол. 

Головите Меси ги постигна во вториот меч од Групата Ј против Австрија, извојувајќи победа од 2:0, и тој е прв стрелец на овој Мундијал засега, со пет голови од првите два меча. Рекордот на Меси дојде точно 40 години по денот кога неговиот славен сонародник  Диего Марадона - уште една десетка, на Светското во Мексико против Англија во четвртфиналето постигна два гола што влегоа во историјата: првиот, познат и како „Божјата рака“, веројатно најконтроверзниот гол на светските првенства, кога потпомогнат од раката погоди „со глава“  за водство на својот тим; и вториот, за многумина најубавиот гол на сите времиња, кога претрча половина тим на Англија и на крајот постигна погодок.  

Добро утро, ви пишува Игор Петровски од дигиталната редакција на „Блумберг Адрија“, ова се петте вести за почеток на денот: 

 

Топлотниот бран во Европа се засилува, Франција со црвен аларм

Топлотниот бран што ја зафаќа западна Европа се очекува да се засили оваа недела, со опасно високи и влажни температури и рекорди во Франција, Велика Британија, Шпанија и Германија.

Жештината што е предизвикана од висок притисок и е потпомогната од развојот на Ел Нињо доведе до големи нарушувања. Има затворени училишта во Франција, а е откажана и јавна проекција на Светското првенство во Шпанија. Прогнозите за необично топли температури продолжуваат низ јули, што го прави ова само рана летна проба за најбрзо-затоплувачкиот континент во светот.

 

Дали македонски директор може да ве викне на работа: Сѐ што треба да знаете за годишниот одмор

Останува уште една недела за користење на деновите од „стариот одмор“. Согласно член 141 од Законот за работни односи (ЗРО) 30 јуни е последниот ден за користење на неискористените денови од ланскиот одмор. Овој член предвидува дека годишниот одмор по правило се користи во текот на календарската година. Но може да се користи во повеќе делови во договор со работодавачот. 

Сепак, основно право на работникот е во еден дел од годишниот одмор да спои барем две непрекинати работни недели, односно 10 работни дена. Празниците, саботите и неделите не влегуваат во пресметката. Законски годишниот одмор не смее да трае помалку од 20 дена, а најмногу до 26 дена, но продолжувањето на годишниот одмор се овозможува со колективни договори. Одговараме на основните прашања во врска со користењето на годишните одмори.

 

Фабрика за мозоци: Тајната на шпанската тренерска доминација

Во летото 2025 година, кога Луис Енрике ја подигна титулата во Лигата на шампионите со ПСЖ, клуб кој со години беше симбол на европско разочарување, клуб кој чинеше милијарди, а освојуваше само домашни натпреварувања, Шпанија имаше тренери кои управуваа со речиси секој релевантен проект во европскиот фудбал.

За да се разбере зошто на шпанските тренери им паѓаат во раце најамбициозните проекти во глобалниот фудбал, треба да се почне од еден детаљ кој лесно може да не се забележи  - Шпанија не произведува само добри тренери. Таа изгради инфраструктура која гарантира континуирано создавање фудбалски стратези, генерација по генерација, без разлика дали актуелен шампион е Реал или Барселона, дали репрезентацијата е на врвот или во криза.

 

Експертите за ВИ на „Гугл“ му бегаат кај конкуренцијата – акциите веднаш надолу

Акциите на „Алфабет“ (Alphabet Inc.), компанијата сопственик на „Гугл“ (Google),  паднаа во понеделник по заминувањето кај конкуренцијата  на уште еден висок менаџер одговорен за вештачка интелигенција. Акцијата падна за дури 7,2 отсто, најмногу во текот на еден ден од февруари наваму, откако потпретседателот на „Гугл ДипМајнд“ (Google DeepMind), Џон Џампер, изјави во текот на викендот дека заминува во „Антропик“ (Anthropic). Минатата недела, еден од најистакнатите истражувачи на „Гугл“ Google, Ноам Шазир, објави дека заминува во „Опен еј-ај“ (OpenAI).

Падот на „Алфабет“ доаѓа во услови на забележлива слабост и кај другите технолошки акции со мега капитализација, при што индексот на Блумберг  што ги следи т.н. “Седум величествени“ (Magnificent Seven) падна за дури 2,2 отсто во понеделник. „Амазон“ (Amazon.com Inc.) падна за дури 4,9 отсто, додека „Мета“ (Meta Platforms Inc.) и Microsoft Corp.) загубија повеќе од 2 отсто од вредноста.

 

Тужба против бензински пумпи од Калифорнија – со помош на вештачка интелигенција ги „пумпале“ цените

Група потрошувачи од Калифорнија во тужба тврдат дека сопствениците на бензински станици, вклучувајќи ги „Волмарт“ (Walmart Inc.), „Маратон Петролеум“ (Marathon Petroleum Corp.), „БП“ (BP Plc.) и „7-Елевен“ (7-Eleven Inc.), користат вештачка интелигенција за нелегално манипулирање со цените на бензинските пумпи во државата која веќе има највисоки цени во САД.

Компаниите, кои управуваат со повеќе од 1.700 бензински пумпи низ целата држава, користат алатка со вештачка интелигенција од „Калибрејт Фјуел Системс“ (Kalibrate Fuel Systems) која автоматски ги прилагодува цените врз основа на доверливи податоци во време кога бензинот надмина 7 долари за галон (околу 3,9 литри) во некои области, според тужбата поднесена во понеделник до федералниот суд во Сакраменто.