И додека Македонија е сѐ уште заглавена во чекалната на евроинтеграцискиот процес од добро познатите причини, Црногорците веќе прават планови за што ќе ги потрошат парите што Европската унија ќе ги издвои откако земјата наскоро ќе стане членка.
Европската комисија вчера предложи финансиски пакет од околу 3,2 милијарди евра за Црна Гора во рамки на следниот седумгодишен буџет на Европската унија (2028–2034), поаѓајќи од претпоставката дека земјата би можела да стане полноправна членка на ЕУ од 1 јануари 2028 година. Овој пакет ќе го чини секој граѓанин на ЕУ во просек по едно евро или по едно кафе годишно.
Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот:
Од денеска во Македонија повисоки казнени камати
Покачувањето на основната каматна стапка за 0,25 процентни поени од страна на Народната банка на 16 јуни годинава, прво во 2026, предизвика и зголемување на казнените (затезните) камати во земјава. Од денеска, први јули, па до крајот на годинава, референтната стапка за пресметување на стапката на казнена камата изнесува 4,25 отсто, колку што е и основната, односно каматната стапка на благајничките записи.
Референтната стапка за пресметување на стапката на казнена камата, за периодот од 1 јануари 2026 година до 30 јуни 2026 година, изнесува 4,00 отсто. За обврски во домашна валута сега казнената камата ќе биде 12,25 отсто за физички и 14,25 отсто за правни лица.
Станбеното кредитирање расте побрзо од лани - колку имаат влијание олеснетите услови од Народната банка?
Олеснувањето на станбеното кредитирање со мерките на Народната банка донесени кон крајот на 2025 година го зголеми интересот за овие кредити, велат од домашните банки, со забелешка дека сепак периодот е прекраток за да се оценат целокупните ефекти врз пазарот на станбени кредити.
Да потсетиме, Народната банка во септември 2025 година донесе мерки со кои прв стан може да се купи по олеснети услови, додека тие што веќе имаат дом и купуваат дополнителна недвижност, ќе подложат на построги услови за купување. Новината беше во тоа што од први декември минатата година оние што купуваат прв стан може да добијат станбен кредит од банките и со учество од 10 проценти од вкупната вредност на објектот за живеење, а за сите преостанати случаи минималното сопствено учество се зголемува од постојните 15 на 25 проценти од вредноста на станот.
Што се случува со биткоинот? “Ова не е само краткорочна корекција“
Биткоинот падна под 60.000 долари на почетокот на јуни, што е најниско ниво од крајот на 2024 година. Цената на најголемата криптовалута сега е преполовена од рекордно високите 128.000 долари во октомври минатата година.
Според проценката на аналитичарите на „Дојче Банк“ (DB) предводени од Марион Лабур, најновиот пад не е само краткорочна корекција, туку одразува подлабоки промени во пазарната средина. Меѓу клучните причини за слабоста на биткоинот, тие го наведуваат заострувањето на монетарната политика во САД, одливот на капитал од биткоин ЕТФ-ите, промените во расположението на институционалните инвеститори и зголемената конкуренција од вештачката интелигенција во прибирањето инвестициски капитал.
Маск плаќа 60 милијарди долари за Курсор за да ја забрза трката во ВИ
Пред само две недели „Спејс екс“ го реализира најголемото ИПО во историјата и собра повеќе од 85,7 милијарди долари, а само неколку дена подоцна објави дека го презема Курсор.
Курсор повеќе нема неприкосновена позиција меѓу алатките за пишување код со ВИ, бидејќи Клод код на „Антропик“ му презеде дел од пазарниот замав. Со купувањето на Курсор, „Спејс екс“ добива производ, корисничка база и најкраток пат за да го намали заостанувањето во трката за ВИ, додека Курсор добива финансиска поддршка за уште посилно враќање на пазарот.
Добавувачите на производителите на чипови чекаат големи нарачки, нивните акции рушат рекорди
Акциите на компаниите што произведуваат опрема и материјали што потоа се користат за производство на чипови растат оваа недела, бидејќи зголемените инвестиции од водечките производители на чипови во Јужна Кореја го зајакнуваат оптимизмот на инвеститорите.
„АСМЛ“ (ASML Holding NV) затвори во вторникот со пораст од 6,8 отсто во Амстердам, достигнувајќи нов рекорд. Американските конкуренти „Аплајд Матириалс“ (Applied Materials Inc.) и „Кеј ел еј“ (KLA Corp.) пораснаа за повеќе од шест и девет отсто на денешното тргување во Њујорк. На дводневна основа, трите акции се меѓу најдобрите во Philadelphia Semiconductor Index, кој порасна 7,5 отсто изминативе два дена.
.webp){kind=icon}
