text size
Бил Гејтс, милијардер и соосновач на „Мајкрософт“ (Microsoft), на 26 август објави есеј од шест илјади збора во кој порача дека, кога би можел, би го забавил развојот на вештачката интелигенција (ВИ). Својот став дополнително го објасни во интервју за „Њујорк тајмс“ (New York Times), велејќи дека „приватно луѓето што разбираат колку е добра оваа технологија и колку брзо напредува се многу загрижени“, но дека малкумина од нив јавно зборуваат за тие проблеми.
Тој ја отфрли идејата индустријата да биде оставена сама да се надгледува: „Саморегулација на најопасната алатка што некогаш е измислена? Не, благодарам!“ Истовремено, расте отпорот низ светот за градење на нови податочни центри, клучната инфраструктура за развојот на ВИ, а во Македонија се спрема теренот за првиот наменски хиперскален податочен центар.
Добро утро, ви пишува Игор Петровски од дигиталната редакција на Блумберг Адрија, ова се петте вести за почеток на денот:
„ГигаВорлд АИ МКД“ сака да развива центар за податоци во Македонија
Владата на последната седница разгледувала информација за потпишување на меморандум за разбирање со „ГигаВорлд АИ МКД Инц“ за развој на наменски хиперскален центар за податоци со вештачка интелигенција во Македонија. Со овој чекор Владата продолжува да работи на реализација на стратегиската цел за развој на центри на податоци во Македонија, што наиде на отпор кај дел од еколошките активисти и дел од опозициските политички партии.
Што е хиперскален центар за податоци? Според дефиницијата на ИМБ, хиперскален центар за податоци е масивен центар за податоци кој обезбедува екстремни можности за скалабилност и е дизајниран за големи работни оптоварувања со оптимизирана мрежна инфраструктура, поедноставена мрежна поврзаност и минимизирана латентност.
Дали сега е повторно време за инвестирање во Европа?
Европа се претвора од регион со низок раст во регион на стратешки инвестиции, а компаниите што учествуваат во енергетската транзиција, одбранбената автономија и технолошкиот суверенитет стануваат главни носители на растот на заработките.
Европа денес има интересна комбинација од три реалности што ретко се појавуваат истовремено, закрепнување и забрзување на корпоративните заработки, голем повеќегодишен инвестициски циклус и сè уште пониски вреднувања од американскиот пазар.
Каде во Европа е најисплатливо да се купи стан за издавање, а какви приноси нуди регионот?
При купување стан во 2026 година, заради издавање под кирија, важно е да се има предвид дека пресметката не е толку поволна како порано. Иако за многу луѓе овој вид бизнис изгледа како едноставна и релативно лесна, брза заработка, станува сè појасно дека високите цени на недвижностите „изедоа“ добар дел од потенцијалниот принос, бидејќи кириите не растеа насекаде со исто темпо како цените на квадратурата.
Ова е случај во Македонија и регионот, но и низ цела Европа. Сепак, постојат исклучоци каде што кириите се за нијанса повисоки од цените или барем разликата меѓу нив е помала, па тие пазари сега ја добиваат својата петминутна слава кај недвижностите.
Зошто високите приноси на државните обврзници го вклучија алармот
Трошоците за задолжување на државите се зголемуваат низ целиот свет, бидејќи инвеститорите бараат поголема награда за да им биде привлечно „чување“ на долг со поголем рок на достасување. Повлекувањето на инвеститорите од долгорочните државни обврзници е поттикнато од низа на загрижувачки состојби, вклучувајќи ги растечките фискални дефицити и упорната инфлација.
Владите исто така мора да се натпреваруваат за вниманието на инвеститорите, бидејќи технолошките компании издаваат огромни количини на долг за да ја финансираат изградбата на инфраструктура за вештачка интелигенција (ВИ).
„ЏП Морган“ и „Велс Фарго“ претпазливи во однос на американските акции
„Велс Фарго“ (Wells Fargo & Co.) е втората банка од Волстрит што стана претпазлива во однос на американските акции оваа недела, бидејќи пазарот се ближи кон она што е за акциите историски најлошиот месец во календарот, а претстојните избори за Конгресот ја зголемуваат неизвесноста околу трговијата со акции на компании поврзани со вештачката интелигенција (ВИ).
Аналитичарите на банката, предводени од Осунг Квон, главен стратег за акции на фирмата, предупредуваат на „широка претпазливост“ влегувајќи во септември, бидејќи вложувачите стануваат сè позагрижени за одржливоста на бумот на инвестициите во ВИ. Тимот очекува стравот околу капиталните расходи поврзани со ВИ проектите да достигне кулминација.
.webp){kind=icon}
