Зелена агенда, ВИ и говеда - пет вести на денот

Европската централна банка ги зголеми каматните стапки по вторпат откако почна војната со Иран во февруари, како одговор на знаците дека инфлацијата ќе остане значително над 2 отсто.

„Конфликтот на Блискиот Исток продолжува да создава инфлациски притисоци, а инфлацијата ќе остане значително над целта подолг временски период“, се вели во соопштението. „Изгледите остануваат многу неизвесни, со ризици за повисока инфлација и за послаб економски раст.“

Добро утро, ви пишува Игор Петровски од дигиталната редакција на Блумберг Адрија, ова се петте вести на денот:

 

Зелената агенда и дигитализацијата се пречка за пробив на нашите компании во странство

И покрај големиот број можности, македонските компании се соочуваат со многу предизвици што им ја ограничуваат способноста за приближување кон стандардите што се бараат во Европската Унија. Тие предизвици се однесуваат токму на секторите што се носители на економската активност во Европа.

Во најновиот извештај на ОЕЦД се наведува дека македонските мали и средни претпријатија (МСП) во земјава (99 отсто од сите компании) имаат проблеми со зелената транзиција и дигитализацијата – клучните сектори што носат забрзан развој. Според извештајот,  во моментов само околу 25 отсто од овие претпријатија во земјава нудат зелени производи или услуги, при што високите трошоци се посочуваат како главна пречка.

 

Зошто одгледувањето говеда станува сѐ поисплатливо?

Побарувачката за говедско месо расте, стадата говеда се намалуваат, а цените нагло пораснаа во последните години. Сепак, овогодишниот пад на цените во Европа го отвора прашањето дали говедското месо конечно ја достигна границата на она што потрошувачите се подготвени да го платат.

На прв поглед, високите цени на говедското месо може да изгледаат како добра вест за големите компании за месо кои котираат на берзата. Сепак, во пракса честопати е токму спротивното. Бидејќи недостигот од добиток е главниот двигател на високите цени, преработувачите на месо мора да плаќаат значително повеќе за својата клучна суровина, што ги намалува нивните маржи. Следствено, најголемите добитници во тековниот циклус не се кланиците и преработувачите, туку одгледувачите на добиток.

 

Драматични предупредувања од Силициумската долина за егзистенцијалните ризици од вештачката интелигенција

Со години веќе, некои од водечките личности во Силициумската долина предупредуваа дека вештачката интелигенција (ВИ) може да претставува егзистенцијална закана за човештвото, дури и додека тие самите се залагаа за развој на технологијата. Оваа недела, оставката на еден истражувач од „Антропик“ го донесе овој наратив во фокусот на јавноста.

Џејкоб Коксон, кој не беше дел од раководните структури,  даде отказ од работа и ги обвини двајцата свои поранешни работодавци – „Антропик“ и „Опен -еј-ај“ - дека „се коцкаат со нашите животи“ со „трката кон супер-интелигентна ВИ “. Коксон рече дека луѓето што ја градат ВИ веруваат дека таа би можела „да нè убие сите до крајот на деценијата“, поента што подоцна ја повторија и другите во компанијата, преку социјалните мрежи.

 

„Меркадо либре“: Дали „Амазон од Латинска Америка“ е следната голема инвестиција?

Кога инвеститорите бараат алтернатива на „Амазон“ (Amazon) надвор од американскиот пазар, едно име се издвојува, а тоа е „Меркадо либре“ (MercadoLibre). Компанијата од класичен онлајн трговец прерасна во доминантна платформа на Латинска Америка, поврзувајќи е-трговија, логистика, огласување, дигитални плаќања и кредитирање.

Најсилни позиции има во Бразил, Мексико и Аргентина, а токму широчината на тој опфат објаснува зошто „Меркадо либре“ го доби прекарот „Амазон на Латинска Америка“.

 

„НЛБ Групацијата“ купи 25 отсто од словенечката банка „ДБС“

„НЛБ Групацијата“ склучи договор за купување акции со „Скупина Прва д.д.“ и нејзините поврзани страни, за стекнување на 25,66 отсто од сите нематеријализирани акции на „Дежелна банка Словеније д.д“ (ДБС), објавија од „НЛБ“ во четврток.

Се очекува трансакцијата да биде завршена по добивањето на сите потребни регулаторни одобренија, најверојатно во втората половина од следната година. „НЛБ Групацијата“ не очекува никакви пречки за добивање на такви одобренија. Покрај тоа, „НЛБ Групацијата“ ја истражува и можноста за стекнување дополнителни акции во „ДБС“.