Лос Анџелес е погоден од најголемата природна катастрофа во последните децении, бидејќи шумските пожари, поттикнати од ветрови со јачина на ураган, ги зафатија богатите населби и принудија повеќе од 100.000 жители да се евакуираат.
Шумските пожари изгореа повеќе од 27.000 хектари, нарушувајќи го животот во вториот по големина град во Америка. Изгореа домови и бизниси, училиштата и патиштата се затворени, квалитетот на воздухот опадна, а илјадници раселени жители бараат хотелско сместување или засолниште кај пријатели и семејството.
Ви пишува Игор Смилевски од дигиталната редакција на „Блумберг Адрија“. Oва се петте вести што треба да ги знаете на почетокот од денот.
Причини поради кои становите и годинава ќе поскапуваат
Крајот на 2024 година го обележи забрзување на растот на цената на становите. „Блумберг Адрија“ веќе пишуваше дека во четвртиот квартал лани цените на недвижностите се зголемија за 10,6 отсто на годишно ниво.
Ваквиот тренд ќе продолжи и во текот на оваа година, велат познавачите на состојбите. Растот на цените и натаму ќе го диктираат истите услови како и досега, но ќе има и некои нови елементи.
Колку ќе поскапат становите никој не прогнозира, a во моментов во најатрактивните скопски општини цената оди и до 1.900 евра за метар квадратен. Во текот на 2024 година, во општина Центар цената во определени случаи надминуваше и 2.800 евра.
Пресврт: Еуриборот расте - што се случува?
Референтната каматна стапка Еурибор, која ја одредува каматата на кредитите со променлива стапка, лани постепено се намалуваше речиси до крајот на годината, што беше добра вест за оние кои се задолжуваа или размислуваа за задолжување. Сепак, во првите денови од новата година се случи пресврт – Еуриборот расте.
Аналитичарот на „Блумберг Адрија“, Михаел Блажековиќ, објаснува дека порастот на Еурибор е поттикнат од несигурноста околу потенцијалните царини на САД и порастот на инфлацијата во еврозоната во декември на 2,4 проценти (на годишно ниво) – повисоката инфлација првенствено може да се припише на сезонските трошоци за одмор и скромното зголемување на цените на гасот, вели тој.
Вештачката интелигенција може да збрише 200.000 работни места на Волстрит
Глобалните банки ќе намалат до 200.000 работни места во следните три до пет години, бидејќи вештачката интелигенција презема задачи кои моментално ги извршуваат човечки работници, според „Блумберг интелиџенс“ (Bloomberg Intelligence).
Главните информатички и технолошки директори анкетирани од БИ посочуваат дека во просек очекуваат нето намалување од 3 отсто на нивната работна сила, според извештајот објавен во четвртокот.
„Сити“ во извештај во јуни посочи дека вештачката интелигенција веројатно ќе замени повеќе работни места во банкарската индустрија отколку во кој било друг сектор. Околу 54 отсто од работните места во банкарството имаат висок потенцијал да бидат автоматизирани, изјавија од „Сити“ во тоа време.
Револуционерни иновации на годината
Лас Вегас и годинава стана центар на технолошкиот свет, каде што за време на четири дена се одржува долгоочекуваната конференција ЦЕС (CES 2025), па посетителите од сите краишта на светот откриваат што носи новата година – од револуционерни чипови кои ветуваат, до новитети во вештачката интелигенција и роботи кои би се грижеле за нашите идни потреби.
Гиганти како „Енвидија“ (Nvidia), „Самсунг“ (Samsung) и „Тојота“ (Toyota) покажаа што нè очекува во 2025 година и понатаму, со откривање на нови производи и проекти на иднината, како и концепти. Покрај напредни решенија за паметни куќи и носливи уреди, овогодинешниот саем понуди и увид во иднината на автономните возила, одржливите технологии и уметничките иновации – од кои некои нè изненадија, а други нè забавуваа.
Униформата на шефовите - како се облекуваат нашите менаџери?
Добре дојдовте во Менаџери лично, рубриката што минатиот месец ја воведовме во „Блумберг бизнисвик Адрија“. Целта е да ги откриеме различните навики на менаџерите од регионот во нивното слободно време, но и кога се ангажирани, а кои директно или индиректно придонесуваат за нивната успешност и изглед за пример.
Ја отворивме рубриката со тоа од каде ја црпат енергијата, а продолжуваме со нивниот избор на облека и модни адути.
.webp){kind=icon}