Украина соопшти дека е подготвена да го прифати предлогот на САД за 30-дневен прекин на огнот во војната со Русија, се вели во заедничката изјава објавена по разговорите во Саудиска Арабија во вторникот.
Соединетите Американски Држави сега ќе го пренесат овој предлог до Русија за да побараат нејзино одобрување, изјави американскиот советник за национална безбедност Мајк Волц за новинарите во Џеда по осум часа преговори.
Добро утро! Ова се петте вести што треба да ги знаете на почетокот од денот.
Македонија старее - цвета бизнисот со домови за возрасни лица
Речиси за трипати се зголемил бројот на домови за згрижување возрасни лица во Македонија во изминативе петнаесетина години. Во 2011 година во земјава имало вкупно 15 таканаречени домови за стари лица (државни и приватни), а денес функционираат вкупно 44 такви установи.
Според податоците од Министерството за социјална политика, во земјава има пет државни дома за стари лица (во Скопје, Куманово, Прилеп, Битола и Берово), со вкупен капацитет од 638 легла, додека во приватниот сектор активно функционираат вкупно 39 дома, со вкупен капацитет за сместување од 1.563 лица.
Со оглед на тоа што демографската слика на Македонија е лоша, односно се зголемува бројот на возрасни лица и македонската нација старее, анализиравме што се нуди на пазарот и каква перспектива има вложувањето во установи за згрижување возрасни лица.
Розови времиња за компаниите од одбраната
Одбранбениот сектор влегува во 2025 година обликуван од значајните глобални промени. Доаѓањето на новата администрација во САД ја доведе во прашање иднината на НАТО и традиционалните воени сојузи. Паралелно, Европа значително ги зголеми трошоците за одбрана од почетокот на војната во Украина во 2022 година. Како одговор на геополитичките предизвици, лидерите на Европската унија неодамна се договорија за заеднички инвестиции до 800 милијарди евра за зајакнување на одбранбените капацитети.
Инвеститорите гледаат поголем раст на приходите за европските компании во споредба со нивните американски конкуренти во наредниот период. Сепак, поради фрагментарното производство организирано на ниво на поединечни земји, Европа е подложна на поголем ризик од САД.
Влезот во СЕПА ќе донесе повеќе странски инвестиции
Трансфер на пари во друга држава за десет секунди, во кое било време од денот, без разлика дали банките работат или не, и тоа без повисоки трошоци. Ова е една од придобивките на СЕПА (англ. Single Euro Payments Area) - единствената област за плаќање во евра, во која минатата недела Македонија стана 39 членка.
Со пристапувањето во СЕПА освен полесниот проток на пари што ќе донесе корист за економијата, се подобрува и кредибилитетот на државата, вели во разговор за ТВ „Блумберг Адрија“ економистот и поранешниот министер за финансии, Кирил Миноски.
Тој додаде дека овој систем ќе овозможи и унапредување на деловното опкружување на земјата што ќе биде еден од условите за привлекување на странски директни инвестиции.
Се стопи богатството на милијардерите
Кога Доналд Трамп положи заклетва како претседател на 20 јануари, тој беше опкружен со некои од најбогатите луѓе во светот. Милијардерите присутни тој ден – вклучувајќи ги Илон Маск, Џеф Безос и Марк Закерберг – никогаш не беа побогати, уживајќи во огромни добивки од зголемениот раст на берзата.
Седум недели подоцна сликата е сосема поинаква. Почетокот на вториот мандат на Трамп донесе драматичен пресврт за многу од овие милијардери кои седеа зад него во Капитол. Според индексот на милијардери на „Блумберг“, оттогаш петмина од тие милијардери изгубиле богатство од вкупно 209 милијарди долари.
Во Јужна Кореја подем на естетската хирургија, но и здравствена криза
Стотици илјади жители на САД, Европа и Азија доаѓаат во Јужна Кореја за различни естетски интервенции, од липосукција до понапредни интервенции, како третмани со матични клетки.
Сепак, додека овој сектор е во подем (само во Гангнам има стотици клиники за естетска хирургија), земјата со 52 милиони луѓе се соочува со здравствена криза. Поради исцрпувачките услови за работа во болниците и недостигот од медицински персонал, практикантите стапија во штрајк. Додека лекарите ги напуштаат болниците за попрофитабилната работа да лекуваат странци, болниците се принудени да ги отфрлат тешко болните пациенти.
.webp){kind=icon}
