Министерството за финансии ќе продолжи со емисиите на граѓански обврзници. Проспектот за новата емисија се подготвува и се очекува да биде објавен до крајот на годината. Од Министерството соопштија дека денеска ќе се изврши исплата на главнината и каматата за втората година од издадената втора граѓанска обврзница. Средствата во износ од 17,6 милиони евра и камата во износ од 880.000 евра ќе бидат исплатени на сметките на граѓаните кои имаат запишано вакви обврзници.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
Избравме дивидендни шампиони во регионот Адрија, но до некои од нив тешко се доаѓа
Како што наближува крајот на годината така почнуваат калкулациите меѓу инвеститорите дали е време да се инвестира во акции што носат дивиденда. Внимателно се анализираат компаниските извештаи од третиот квартал, се прават проекции за приходите и профитот до крајот на годината и се анализира каква дивидендна политика имале досега компаниите. Еден од најдобрите индикатори во овој контекст е дивидендниот принос што покажува колкав принос ќе оствари имателот на акцијата доколку ја купи по пазарната цена и го оствари правото на дивиденда.
За таа цел, во „Блумберг Адрија“ избравме по една компанија од главните индекси од шесте берзи во регионот чии акции имаат убедливо најголем дивиденден принос. Карактеристично е тоа што сите континуирано остваруваат добивка, повеќето од нив имаат традиција на исплата на дивиденди, но до некои од нив е тешко да се стигне поради затворената акционерска структура односно малиот број акции што се нудат за тргување на пазарот.
Прашавме македонски креативци дали вештачката интелигенција им ги загрозува правата
Во последните години примената на вештачката интелигенција (ВИ) започна да се наметнува во креативните индустрии. Музиката и графичкиот дизајн се области во кои оваа технологија има значајно влијание, како во однос на производството на нови дела, така и во контекст на заштитата на авторските права.
Прашањaта за правата на авторите и етичките проблеми што произлегуваат од користењето на ВИ во овие области се сè поактуелни и го привлекуваат вниманието не само на професионалците туку и на пошироката јавност, па оттука „Блумберг Адрија“ контактираше со двајца експерти, Димитрије Марковиќ, музички продуцент и раководител на операции на платформата за продажба на музички композиции WAVS.com и Игор Делов, графички дизајнер, кои ни понудија своја перспектива на темата.
Ефтимов: Македонија има квалитетен кадар за ВИ, а „Везилка“ ќе ја намали технолошката зависност
Помина точно еден месец откако министерот за дигитална трансформација Стефан Андоновски официјално го претстави проектот „Везилка“ - национален центар за вештачка интелигенција, оценувајќи го како капитален проект со историско значење за дигиталната трансформација на Македонија. „Ова е капитален проект со историско и национално значење – нова страница во дигиталниот развој на Македонија, во која Владата, универзитетите и индустријата заеднички градат национален систем за вештачка интелигенција. Со ‘Везилка’, нашата држава станува активен дел од европската мрежа на центри за ВИ. Ова е суштински чекор за нашата научна, технолошка и иновациска заедница“, рече тогаш министерот Андоновски.
Суштината на „Везилка“ е едноставна, додаде министерот, да создадеме интелигентни решенија што му служат на човекот – да направиме технологијата достапна, корисна и етична. Дополнително, „Везилка“ ќе функционира и како центар за обука и развој на човечки капитал, каде што ќе се организираат тренинзи, практични проекти и едукативни програми во областа на вештачката интелигенција (ВИ).
ЕУ подготвува нов план за спроведување на трговскиот договор со САД
Европската Унија (ЕУ) подготвува план што ќе им го предложи на САД за спроведување на следната фаза од трговскиот договор што двете страни го постигнаа летово, велат лица запознаени со состојбата. Потегот доаѓа во пресрет на средбата на европскиот комесар за трговија Марош Шефчович со неговите американски соговорници што треба да се одржи во текот на овој месец, велат анонимните извори. Овој чекор е одговор на предлозите што Вашингтон ги испрати до Брисел во текот на годинава, со кои бара правно обврзувачки план за измена на регулативите на ЕУ за кои тврди дека им штетат на американските компании.
Договорот што во август го постигнаа претседателката на Европската комисија (ЕК), Урсула фон дер Лајен, и американскиот претседател Доналд Трамп предвидува тарифа од 15 отсто на поголемиот дел од стоките од ЕУ што влегуваат во САД, но вклучува и обврска да продолжат разговорите за прашања како извозот на челик, како и за другите регулаторни пречки и технички правила што ги отежнуваат увозот и извозот.
Акциите на „Сиско“ скокнаа благодарение на побарувачката за ВИ
Акциите на „Сиско“ (Cisco Systems Inc.) пораснаа во доцнежното тргување откако гигантот за мрежна опрема ја зголеми својата прогноза за 2026 година, покажувајќи напредок во настојувањето да освои поголем дел од трошењето поврзано со вештачката интелигенција. Компанијата, најголемиот производител на опрема што ги што ги управува компјутерските мрежи и интернетот, сега очекува приходи до 61 милијарда долари во фискалната година што завршува во јули.
Тоа е околу една милијарда повеќе од претходната проекција и над процените на Волстрит. „Сиско“ ја зголеми и прогнозата за заработка, која исто така ги надмина очекувањата на аналитичарите.Прогнозата внесе нов оптимизам дека „Сиско“ може да има корист од силното трошење за вештачка интелигенција. Компанијата од Сан Хозе, Калифорнија, ги обновува своите чипови и мрежна опрема за подобро поврзување на серверските рамки и дата-центрите, со цел да се обработуваат покомплексни задачи поврзани со ВИ.
.webp){kind=icon}
