.webp){kind=icon}
Извршната власт на Европската унија (ЕУ) предложи суспензија на 7,5 милијарди евра од буџетот наменет за Унгарија поради сомневања за корупција и измами.
Европската комисија (ЕК) предложи замрзнување на парите според нејзините нови овластувања под таканаречениот режим на условување, се вели во соопштението објавено во неделата. Предложеното блокирање на парите мора да биде одобрено од другите членови.
„Денеска Европската комисија му предложи на Советот мерки за заштита на буџетот под режимот на условување“, се наведува во соопштението. „Ова е за да се обезбеди заштита на буџетот на ЕУ и финансиските интереси на ЕУ од прекршување на владеењето на правото во Унгарија“, се додава во него.
Унгарскиот премиер Виктор Орбан ги поткопа демократските основи на ЕУ по невидената консолидација на власта во која го промени уставот, изборните закони и го прошири своето влијание врз судовите, медиумите, културата и образованието. Од 2010 година, под негово водство, Унгарија забележа голем пад на вредноста на индексот на перцепција на корупцијата пресметан од Транспаренси Интернешнл и сега е на претпоследното место во ЕУ, веднаш до Бугарија.
Загрижена за потезите кои би можеле да ја поткопаат независноста на судиите, принципите на малцинските права и приматот на правото на ЕУ, Унијата смисли нов механизам за заштита на своите финансиски интереси од членовите обвинети за демократско назадување. Унгарија е првата земја на мета, но Полска, чии власти ја имитираат политиката на Орбан, ризикува слична судбина.
Конфликтот меѓу ЕУ и Унгарија имаше последици и за унгарската валута, па оваа година форинтата се лизна речиси десет отсто во однос на еврото. Како една од причините за непропорционалната распродажба на валутата, инвеститорите ја наведуваат неизвесноста за идниот прилив на средства од ЕУ.
Со цел да се намалат тензиите со ЕК, во последниот месец државата понуди да основа агенција за борба против корупцијата и да ги прилагоди законите, вклучително и оние кои ги регулираат јавните набавки.
Во споредба со другите регионални валути, форинтата флуктуира многу повеќе во однос на еврото.
Во следниот месец владите на ЕУ мора да донесат конечна одлука дали Унгарија ќе биде блокирана за финансирање, со можност тој рок да се продолжи на два месеци. За да стапи во сила предлогот на Комисијата потребно е квалификувано мнозинство. Во случајот со ЕУ, тоа значи најмалку 55 отсто од земјите-членки и оние членки кои претставуваат најмалку 65 отсто од вкупното население на ЕУ.
Орбан не штедеше време да ги испрати своите службеници во други земји за да ги убеди да гласаат против замрзнувањето на парите. „Унгарската влада е подготвена да обезбеди гаранции за да се осигура дека унгарскиот народ ќе ги добие парите што се наменети за него“, напиша министерката за правда, Јудит Варга на Фејсбук во четвртокот по средбата во Париз со Гаранс Пино, советник на францускиот претседател Емануел Макрон за европски птрашања.
Членовите на Европскиот парламент оваа недела изјавија дека извршната власт на Унијата дозволила проблемите во Унгарија да се натрупуваат предолго и дека недостатокот на решителен одговор „придонесе за замрачување на демократијата“ во таа земја. „Отсуството на реакции на кршење на владеењето на правото ги поткопува демократските институции и на крајот влијае на човековите права и животите на сите во земјата каде што се случуваат овие прекршувања“, се вели во резолуцијата на Европскиот парламент.
