Економијата на Шпанија би била во голем проблем без мигрантите

Владејачките социјалисти во Шпанија предупредуваат дека опозициските партии кои сакаат да ја запрат проимиграциската политика на Мадрид ги загрозуваат клучните столбови на шпанското општество.

Поради драстичниот пад на наталитетот, јавните служби во Шпанија сè повеќе зависат од работата на мигрантите, како и баровите и рестораните што претставуваат столб на општествениот живот во многу градови и места, изјави во интервју Елма Саиз, министерка за миграциски прашања. Доколку актуелниот прилив на работна сила биде запрен, последиците би биле драматични, додаде таа.

„Направивме модел како би изгледала Шпанија во 2075 година доколку миграциските текови се намалат за 30 отсто“, изјави Саиз во интервју дадено во седиштето на Обединетите нации во Њујорк. „Притисокот врз здравствениот систем би растел. Училишта, фарми, многу барови и кафулиња би биле затворени. Секој граѓанин би морал да издвојува многу повеќе за да се одржат јавните услуги.“

Нејзините коментари ја отсликуваат сè пожестоката политичка дебата што ќе ја обликува иднината на шпанската политика, додека премиерот Педро Санчез се подготвува за кандидатура за нов мандат следната година.

Bloomberg

Либералниот пристап кон миграцијата и економскиот раст што произлезе од него, Санчез ги претвори во еден од клучните адути на својата политичка платформа. Но, крајнодесничарската партија „Вокс“ (Vox) се обидува да ја искористи загриженоста на граѓаните околу достапноста на јавните услуги, ветувајќи приоритет при вработување во јавниот сектор и користење услуги за луѓето родени во Шпанија.

Тие аргументи ќе бидат ставени на тест веќе во недела, кога гласачите ќе излезат на регионалните избори во Андалузија, најголемиот шпански регион.

Во свет потресен од враќањето на Доналд Трамп во Белата куќа и растечките тензии околу миграцијата, Санчез се позиционираше како противник на сè посилната антимигрантска политика — одбивајќи ги американските барања за зголемување на издвојувањата за одбрана и поддршка за војната против Иран, со што предизвика гнев кај американскиот претседател.

Во април тој дополнително ја зацврсти политиката на интеграција на мигрантите со програма што овозможува издавање дозволи за престој на нелегални мигранти кои веќе живеат во земјата. Кандидатите мора да докажат дека престојуваат во Шпанија најмалку пет месеци и дека немаат криминално досие, но не мора да имаат работа.

Првичните проценки на владата покажуваа дека околу 500.000 луѓе би можеле да ја искористат оваа можност, но високи функционери сега проценуваат дека бројот на барања би можел да достигне еден милион до крајот на јуни.

„Нам ни е потребно население“, вели Рут Бермехо, истражувачка за миграции од тинк-тенк организацијата „Елкано“ (Elcano Royal Institute) во Мадрид. „Друг начин да има повеќе млади луѓе е семејствата да имаат повеќе деца, но Европа нема популациска политика што би можела да го реши тој проблем.“

Благодарение на мигрантите кои ја поттикнуваат домашната потрошувачка и ја зголемуваат понудата на работна сила, Банката на Шпанија прогнозира економски раст од 2,3 отсто оваа година — повеќе од двојно побрз од просекот на еврозоната.

Сепак, на овие планови им се спротивставуваат традиционално конзервативната Народна партија и „Вокс“, кои веќе заедно владеат во неколку шпански региони. Нивната цел е следната година да го сменат Санчез од власт, а анкетите покажуваат дека имаат реални шанси за парламентарно мнозинство.

„Јавните услуги се преоптоварени и постои перцепција дека системот повеќе не функционира како што треба“, изјави Алма Ескура, пратеничка на Народната партија во Европскиот парламент задолжена за миграциски прашања. Според неа, Санчез „испраќа порака дека прекршувањето на законите се наградува“.

Истовремено, сојузот меѓу двете десничарски партии не е целосно стабилен. „Вокс“ настана со отцепување на дел од лидерите на Народната партија, а потоа ѝ презеде значителен дел од гласачкото тело.

Анкетите покажуваат дека Народната партија најверојатно ќе го задржи апсолутното мнозинство во Андалузија и покрај обидите на „Вокс“ да ѝ одземе гласачи. Но, доколку биде принудена да се потпре на поддршката од „Вокс“, влијанието на крајната десница дополнително би пораснало пред следните парламентарни избори.

Годинешната програма за легализација на статусот на мигрантите е дел од поширока политика благодарение на која населението на Шпанија пораснало за 3,5 милиони луѓе откако Санчез дојде на власт во 2018 година. Бројот на жители сега се приближува до 50 милиони, што претставува раст од една четвртина во споредба со почетокот на векот. Уделот на населението родено во странство се зголемил од 2 отсто во 2000 година на речиси 20 отсто денес.

Владата проценува дека околу две третини од луѓето кои би имале корист од програмата за легализација на статусот на мигрантите доаѓаат од Латинска Америка, чие јазично и културно наследство е поблиско до шпанското општество, што ја олеснува интеграцијата. Значителен број мигранти доаѓаат и од Африка.

Педро Санчез/Bloomberg

 

„Во сегашната ситуација на притисок и преоптовареност во Шпанија — повеќе никој не може да влегува, ниту легално ниту нелегално“, изјави пратеникот на „Вокс“, Карлос Ернандес Керо. „Ниту една држава не може да издржи толку силен раст на населението за толку краток период.“

„Вокс“, исто така, го критикува нивото на квалификации на новодојдените мигранти во економија која веќе заостанува зад одредени членки на Европската Унија според продуктивноста и иновациите. Владата, пак, наведува дека мнозинството мигранти работат во услужните дејности, градежништвото и секторот за нега.

Шпанците засега се поделени по ова прашање. Истражувањето што овој месец го објави „40дБ“ (40dB) за весникот „Ел Паис“ (El País) покажало дека 38 отсто од испитаниците ја поддржуваат програмата, додека 33 отсто се против.

Гласачите следната година ќе одлучат дали сакаат земјата да продолжи по тој пат.

„Ќе ни бидат потребни меѓу 200.000 и 300.000 дополнителни работници годишно за да го одржиме системот на социјална заштита“, изјави министерката Саиз. „Изборот беше јасен: отворена и просперитетна или сиромашна и затворена земја.“