Европската централна банка (ЕЦБ) го удвои бројот на банки опфатени со истрагата за поврзаноста со приватното кредитирање, во момент кога овој сектор се соочува со пад на довербата кај инвеститорите.
Годинава ЕЦБ бара дополнителни детали за изложеноста од повеќе од 20 банки, што претставува зголемување во однос на десетината банки опфатени со претходните проверки, изјавија лица запознаени со темата. Банките со значајни врски со приватното кредитирање ќе мора да доставуваат годишни извештаи со детални податоци, велат изворите кои побарале да останат анонимни бидејќи комуникацијата не е јавна. Портпаролот на ЕЦБ одби да коментира.
Иако надзорот на ЕЦБ се надоврзува на слични активности од изминатите две години, вниманието кон оваа индустрија дополнително се засили во последните месеци откако повеќе фондови беа принудени да воведат ограничувања за повлекување средства. Регулаторот е загрижен поради слабостите во начинот на кој традиционалните банки ја евидентираат својата изложеност кон приватното кредитирање, и покрај тоа што овој сектор во еврозоната е помал отколку во САД.
Со изложеноста кон приватното кредитирање во Европа доминираат четири кредитори, при што „Дојче банк“ (Deutsche Bank AG), „Берклис“ (Barclays Plc), „БНП Париба“ (BNP Paribas SA) и „ХСБЦ“ (HSBC Holdings Plc) сочинуваат речиси две третини од вкупната изложеност во овој сектор, според податоците на „Блумберг интелиџенс“ (Bloomberg Intelligence). Сепак, станува збор за „управлив ризик“ бидејќи објавените изложености претставуваат само 2,3 отсто од вкупното кредитно портфолио, објави БИ минатиот месец.
„Изложеностите остануваат релативно ограничени во споредба со другите средства во билансите на банките, но бележат силен раст“, изјави минатата недела во говор Шерон Донери, членка на Надзорниот одбор на ЕЦБ.
„Клучниот проблем не е само големината на овие изложености, туку и способноста на банките правилно да ги агрегираат.“
Тоа подразбира идентификување каде банките кредитираат паралелно со фондовите за приватно кредитирање, како и кога постојат преклопувачки изложености меѓу фондовите, инвеститорите и компаниите од нивните портфолија, објасни таа.
„Слабостите во оваа област може да им го отежнат на банките препознавањето на концентрациите, корелациите и каналите преку кои се пренесува ризикот во услови на стрес“, изјави Донери.
Индустријата на приватно кредитирање, вредна 1,8 билиони долари, растеше во текот на изминатите две децении, делумно и како механизам за насочување на кредитирањето надвор од построго регулираниот банкарски сектор кон поризичните делови од економијата. Сепак, банките и понатаму се изложени на многу фондови за приватно кредитирање, вклучително и преку обезбедување финансиска потпора за зголемување на приносите.
.webp){kind=icon}
