Пожарите се тежок економски удар за погодениот регион во Франција

Францускиот министер за финансии Ролан Лескир изјави дека шумските пожари во југозападниот дел на земјата претставуваат голем економски удар за регионот, бидејќи компаниите и туристите биле принудени да се евакуираат.

„Сите се целосно мобилизирани како одговор на еколошката и социјалната катастрофа“, изјави Лескир по состанокот со осигурителните компании во Министерството за финансии. „Но ова е и економски гром што погоди регион на кој тоа најмалку му требаше.“

Повеќе од 200.000 луѓе се евакуирани од департманот Жиронда, каде што неконтролираните и непредвидливи шумски пожари се шират во регионот околу Бордо. Иако површината зафатена од пожарите во понеделникот наутро во голема мера остана непроменета, ситуацијата и натаму е кревка, изјави Давид Анотел, претставник на Националното здружение на пожарникари, за радиото „Франс инфо“ (Franceinfo).

Околу 13.000 компании се наоѓаат во местата за кои властите наредиле евакуација, рече Лескир.

Министерот за финансии изјави дека осигурителните компании се согласиле да ги продолжат роковите за поднесување барања за надомест на штета поврзана со пожарите. Тој додаде дека осигурителите ќе ги покријат и трошоците за привремено сместување на домаќинствата на кои им е наредена евакуација, дури и ако нивните домови не се оштетени.

Иако пожарите учествуваат со само четири отсто во вкупниот број пријавени штети, тие го создаваат вториот најголем трошок за осигурувањето на домовите, односно околу 25 отсто од вкупните исплати, според извештајот што во 2025 година го објави Француската федерација на осигурувачи (Fédération France Assureurs).