Германските бизнисмени бараат побрзи реформи по победата на АфД

Малите и средните претпријатија во Германија, таканаречените „Мителстанд“ кои го формираат рбетот на најголемата економија во Европа, се вознемирени поради јасната победа на крајно десничарската партија „Алтернатива за Германија“ во Саксонија-Анхалт и ја повикуваат федералната влада во Берлин конечно да ги исполни своите ветени економски реформи за оживување на растот.

Итно е потребна промена на политиката за да се врати довербата во економските перспективи на Германија и да се ограничи поддршката за популистичките партии, изјави Кристоф Алхаус, претседател на германското федерално здружение на мали и средни претпријатија во понеделникот во интервју за телевизијата „Блумберг“.

Победата на АФД е „јасен сигнал за сите луѓе во Берлин и за канцеларот Мерц“, рече Алхаус. „Фрустрацијата е многу, многу голема“.

Традиционалните индустриски сектори на Германија, од автомобилската индустрија до производителите на хемикалии и машини, се под огромен притисок да се приспособат на брзо менувачкиот конкурентски пејзаж. Високите цени на енергијата, пренатрупаната бирократија и жестокиот ценовен притисок од кинеските ривали ги намалија профитите и доведоа до сеопфатни реструктуирања, поттикнувајќи страв кај индустриските работници за нивните економски перспективи.

Неколку германски врвни раководители, вклучувајќи ги и извршниот директор на „Дојче банк“, Кристијан Севинг и извршниот директор на „Инфинеон“, Јохен Ханебек, предупредија на негативни економски последици доколку екстремно десничарските партии продолжат да добиваат на терен, бидејќи тоа може да ги одврати инвестициите и да го отежни наоѓањето и привлекувањето квалификувани работници.

Алхаус рече дека огромното мнозинство компании не ја поддржуваат политиката на „Алтернатива за Германија“ за помала економска интеграција во Европа и потврди дека рестриктивните мерки против имиграцијата би можеле да се претворат во „голем проблем“ за малите и средните компании.

„Многу силниот настап на ‚Алтернатива за Германија‘ е, пред сè, значаен политички сигнал, но сè уште не е непосреден настан на пазарот на капитал“, напиша во белешка главниот стратег за пазари на капитал во „Франклин Темплтон“, Мартин Лик.

„Од перспектива на инвеститорот, би станало проблематично доколку се појават сомнежи во врска со интеграцијата на државата во Европа, нејзината фискална сигурност, нејзината отвореност кон меѓународни квалификувани работници или континуитетот на нејзините енергетски и индустриски политики“, рече тој.

Лук додаде дека „Саксонија-Анхалт, особено - која зависи од нови инвестиции и квалификувана работна сила - тешко може да си дозволи такви сомнежи“.

Во разговор со „Блумберг“ пред изборите во неделата, водечкиот кандидат на АФД, Улрих Зигмунд, им се спротивстави на критичарите и инсистираше дека политиката на партијата всушност ќе помогне во привлекувањето инвестиции.

 

Многу компании „сакаат да инвестираат тука во Саксонија-Анхалт затоа што го гледаат тоа како конкурентска предност и како предност за локацијата ако имаме влада која повторно обезбедува сигурност во планирањето“, рече Зигмунд во едно интервју. Бизнисите „сакаат целосно да ја отстранат идеологијата од поддршката за економски развој и генерално повторно да им дадат слобода на компаниите“.

Саксонија-Анхалт има најнизок БДП по глава на жител од 16-те германски покраини. Од повторното обединување на земјата, населението во Саксонија-Анхалт бележи поголем пад од кој било друг регион, при што бројот на жители се намалил за повеќе од една четвртина помеѓу 1990 и 2024 година.

Големите намалувања во клучните индустрии како што се хемискиот и автомобилскиот сектор предизвикаа страв кај работниците за нивните економски перспективи. Сеопфатното реструктуирање како што е планот за реконструкција на „Фолксваген АГ“, одобрен доцна во четвртокот, ќе има последици во германските региони, вклучително и во Саксонија-Анхалт.