text size
Повеќе од половина милион луѓе излегоа на улиците низ Франција поради сè повисоките трошоци за живот, а протестите прераснаа во насилство и грабежи, меѓу другото и во Париз. Немирите укажуваат на проблемите со кои се соочува земјата во пресрет на претседателските избори следната година.
Околу 550.000 демонстранти учествувале во протестните маршеви низ Франција во саботата, вклучувајќи 110.000 во Париз, изјави министерот за внатрешни работи Лоран Нунез. На маргините на протестите, групи активисти од крајната левица напаѓале полициски станици и други јавни згради, а им се придружиле и ограбувачи кои ја искористиле приликата, рече министерот. Околу 400 лица биле приведени, додаде Нунез.
„Дојде до многу сериозни нереди“, им изјави Нунез на новинарите. „Успеавме некои од нив да ги ставиме под контрола, но обемот на штетата ќе биде исклучително голем.“
Bloomberg
Владата на претседателот Емануел Макрон се соочува со криза поради трошоците за живот, додека истовремено се обидува да го ограничи растечкиот јавен долг на Франција. Опозициските групи, кои во последните две години двапати соборија премиери поради буџетските планови, не биле подготвени на компромис.
„Во нашата република нема место за насилство“, напиша Макрон на социјалната мрежа X. „Оние што вандализираа и напаѓаа префектури и претпријатија, како и оние што ограбуваа дури и наши општински згради, ќе бидат кривично гонети и казнети.“
Само во Париз, поправката на зградите оштетени во подметнати пожари би можела да чини десетици милиони евра, изјави градоначалникот Емануел Грегоар. Полициски станици биле нападнати и во Марсеј и Брест, рече Нунез.
Немири избувнаа и во градови како Стразбур, Руан, Нант, Тулуз и По, каде што групи демонстранти фрлале предмети кон полицијата и палеле улична опрема, автомобили и велосипеди. Во пожарите биле зафатени и градското собрание во Лимож, во централна Франција, како и туристичкото биро во Лион.
Во Италија, маскирани учесници во нередите се судриле со полицијата, ограбувале продавници и палеле имот за време на протестите поради трошоците за живот во Милано, финансискиот центар на земјата, објави новинската агенција АП (Associated Press).
„Протестирањето е право“, изјави премиерката Џорџа Мелони во објава на социјалните мрежи. „Уништувањето на нашите градови не е.“
"
Bloomberg
Во Португалија, Тијаго Оливеира, лидер на синдикалната конфедерација ЦГТП (CGTP), изјави дека протестите што во саботата започнале во Лисабон и во другите делови на земјата имаат цел да им дадат глас на луѓето кои се соочуваат со „брутален раст“ на цените на домувањето, горивата и храната. Протести поради домувањето и трошоците за живот избувнаа и во Шпанија, Албанија и Белгија.
Жолти елеци
Активистите на движењето „Жолти елеци“ во Франција, повремено радикално граѓанско движење кое се појави во 2018 година во борбата против растот на трошоците за живот, ја искористија приликата да се обидат да го заживеат отпорот, повикувајќи ги граѓаните преку социјалните мрежи да излезат на улиците.
Протестите на „Жолтите елеци“ избувнаа откако Макрон предложи зголемување на даноците на горивото.
Истовремено, средношколците продолжуваат со протестите поради условите во училниците, отсуството на наставници и уписите на универзитетите. Овие протести првично не беа поврзани со движењето „Жолти елеци“. Според анкетата на агенцијата „Кластер 17“ (Cluster 17), објавена на 11 октомври, околу 57 отсто од граѓаните на Франција го поддржуваат студентското движење.
Француската влада вети дека ќе ги земе предвид барањата на учениците и студентите, но не е во можност значително да го зголеми буџетот за образование. Додека во Националното собрание се водат расправи, премиерот Себастијан Лекорну се обидува да обезбеди парламентарна поддршка за остро ограничување на потрошувачката и намалување на фискалниот дефицит на пет отсто од бруто-домашниот производ во 2027 година, откако целта не беше исполнета оваа година.
.webp){kind=icon}
