.webp){kind=icon}
Германскиот министер за финансии Кристијан Линднер претстави план на неговата земја следната година да потроши 83,3 милијарди евра за субвенции за гас и електрична енергија, според документ на министерството во кој Bloomberg имал увид.
Од таа сума, 40,3 милијарди евра ќе бидат наменети за покривање на трошоците за гас и парно греење, што вклучува еднократна исплата во декември за компаниите и домаќинствата. Намалувањето на цената на гасот за домаќинствата се планира да стапи на сила во март 2023 година, но во тек се разговори со снабдувачите со енергија за да се оцени дали е можно оваа мерка да се спроведе порано.
43 милијарди евра од вкупно 83,3 милијарди ќе бидат искористени за намалување на трошоците за струја за домаќинствата и бизнисите. Се очекува дел од тие пари да се вратат преку мерки за намалување на неочекуваните профити на производителите на електрична енергија.
„Унипер“ се најде во проблем поради зависноста од рускиот гас, а државата реши да реагира / Bloomberg
Планот предвидува дополнителни 15,2 милијарди евра за акциите на „Унипер“ (Uniper SE), најголемиот германски увозник на гас, кој државата го презеде за да ја спаси компанијата поради зависноста од рускиот гас. Според документот, околу 8,5 милијарди евра се резервирани за други енергетски компании кои се во тешка положба.
Планот е поврзан со неодамна усвоениот Економски и стабилизациски фонд од 200 милијарди евра, кој е дизајниран да ги заштити бизнисите и домаќинствата од повисоките цени на енергијата. До парите може да се пристапи во форма на заеми од државната банка KfV, а финансирањето е надвор од вообичаените буџетски одредби на земјата.
