Компаниите во еврозоната гледаат привремени позитивни знаци што упатуваат дека економскиот пад во регионот може да попушти како што се лади рекордната инфлација, а очекувањата за идното производство се подобруваат.
Активноста во производството и услугите неочекувано порасна во ноември, покажува индексот S&P Global. Иако уште цврсто укажува на тоа дека рецесијата во регионот што опфаќа 19 земји е во тек, сепак дава простор за размислување дека падот може да биде поплиток отколку што се очекуваше.
Ако индексот е над 50, тоа значи раст. Во моментов е зголемен од 47,3 на 47,8 / Bloomberg Mercury
Во Германија, најголемата европска економија, менаџерите за набавка во фабриките известија за подобрени резерви и пократки рокови за испорака на инпутите. Производството на приватниот сектор и натаму се намалува, веќе петти месец по ред, а Франција го забележа првото намалување од февруари 2021 година.
Индексот за управување со набавките е на ниво од 47,8 во ноември, додека претходно изнесуваше 47,3 во октомври. Ниво над 50 би значело раст.
Остар пад
„Јасно е дека производството и натаму е во сериозен загрижувачки пад, а активноста во услужниот сектор, исто така, уште е под интензивен притисок. Со тоа, рецесијата се чини поверојатна, иако најновите податоци даваат надеж дека падот може да не биде толку голем колку што се стравува“, рече Крис Вилиамсон, економист во „С и П глобал“ (S&P Global).
Иако нарачките продолжија да паѓаат со голема брзина во ноември, а растот на вработеноста како резултат на тоа е умерен, топлото време ублажи дел од стравовите од недостиг од енергија во следните месеци. Растот на цените, исто така, е ублажен.
„Не само што тоа би требало донекаде да помогне во зауздувањето на трошоците за живот туку би требало и да ги подобри изгледите за инфлацијата и да го намали притисокот на потребата од натамошно агресивно заострување на монетарната политика“, рече Вилиамсон.
Креаторите на политиката во Европската централна банка (ЕЦБ) сигнализираат дека се далеку од завршување со зголемувањето на каматните стапки и планираат наскоро да почнат да ги намалуваат билансите на институциите. Во исто време, се чини дека апетитите за повторување на преголемите зголемувања од 75 базични бода во септември и октомври паѓаат, а некои од банкарите дури и навестуваат следно зголемување од 50 базични бода.
.webp){kind=icon}
Во моментов нема коментари за веста. Биди прв да коментира...