.webp){kind=icon}
Заклучно со вчера, кога истече рокот, за субвенционирано снабдување со електрична енергија по повластена цена, од 1 декември се пријавиле 233 јавни основни и средни училишта од сите градови (од вкупно 474 на територијата на државата), 50 јавни претпријатија од областа на водоснабдувањето и одведувањето отпадни води (од вкупно 70) и 235 субјекти, физички и правни лица, од областа на прехранбениот сектор.
Во согласност со одлуката на Владата, компаниите што вршат производство на основни прехранбени производи, како масло за јадење, леб и пекарски производи, брашно, млеко и млечни производи, месна и живинарска индустрија, ќе добиваат субвенционирана електрична енергија преку „ЕСМ продажба“, по цена од 80 евра за мегават-час, за основните и средните училишта субвенционираната цена ќе биде по 95 евра за мегават-час, исто како и за јавните претпријатија од областа на водоснабдувањето и одведувањето отпадни води што работат со пумпни и пречистителни станици.
„За оние што ја искористија можноста и се пријавија, АД ЕСМ преку 'ЕСМ продажба' од 1 декември ќе почне со снабдување на трите категории потрошувачи опфатени со одлуката на Владата за субвенционирана струја. Субјектите што не успеале да поднесат комплетни документи до вчера, ќе можат да го сторат тоа во следниот период и ќе бидат ставени на субвенционирано снабдување од 1 јануари идната година“, рече премиерот Димитар Ковачевски на денешната прес-конференција во Владата.
