Британската централна банка мора да продолжи да ги зголемува каматните стапки за да ја врати инфлацијата на два отсто, и покрај економските тешкотии со кои се соочуваат домаќинствата, изјавија двајца од централните банкари. Наведувајќи ги грижите за затегнатиот пазар на труд и високите очекувања за инфлација, заменик-гувернерот Дејв Рамсден рече дека тој е за дополнително заострување. Тие грижи ги повтори и неговата колешка за одредување стапки Кетрин Ман, која рече дека монетарната политика може да направи нешто за да им помогне на луѓето што се борат со зголемените цени на енергијата и храната.
Британската централна банка од декември досега ги зголеми стапките осум пати, со што ги доведе до 13-годишно највисоко ниво од 3 проценти, а пазарите очекуваат покачување на каматите од уште половина поен следниот месец. Рамсден и Ман се едни од најјастребски расположените членови на деветчлениот Комитет за монетарна политика, кои постојано се залагаат за поагресивни потези. Инфлацијата во Велика Британија е 11,1 отсто, што е пет пати повеќе од посакуваното ниво. Сепак, банкарите се поделени околу тоа уште колкаво затегнување е потребно.
Двајца членови гласаа за зголемување на стапките за помалку од 75 базични поени. Реалните плати се очекува да паднат за седум проценти во следните две години. Говорејќи на конференцијата во Лондон, Рамсден рече дека повеќе е загрижен поради тоа што прогнозата на британската централна банка, која покажува пад на инфлацијата под целта во 2024 година, може да ја преувеличи слабоста на економијата во време на одржлива затегнатост на пазарот на трудот и зголемени инфлациски очекувања. Него го загрижува тоа што инфлаторниот менталитет се појави и се вкорени, а го загрижува и растот на платите, кој е поголем од очекувањата.
Неопходни чекори
„Колку и да претставуваат предизвик краткорочните последици за економијата на Обединетото Кралство, одборот мора да ги преземе неопходните чекори во однос на монетарната политика за да ја врати инфлацијата и да ја постигне целта од два отсто на среден рок“, рече Рамсден. Тој додаде дека големото фискално заострување најавено во есенската изјава ќе има многу мал ефект врз стапките. Рамсден изрази скептицизам за длабочината на рецесијата што ја предвидува централната банка и рече дека се сомнева дека невработеноста ќе се зголеми на пет проценти од сегашното ниво од 3,6 проценти.
.webp){kind=icon}
