ЕЦБ пред одлука - се очекува зголемување од 50 базични поени

Европската централна банка (ЕЦБ) на денешниот состанок ќе донесе нова одлука за зголемување на каматната стапка, но овој пат аналитичарите очекуваат таа да биде покачена за 50 базични поени, а не за 75 како досега.

Тоа би ја подигнало депозитната каматна стапка на два отсто, што генерално се смета за ниво кое ниту ја стимулира ниту ја ограничува економијата на еврозоната.

Забавувањето на растот на референтната каматна стапка веројатно би значело приближување до највисокото ниво на каматните стапки во рамките на најагресивниот период на затегнување на монетарната политика од создавањето на ЕЦБ. Растот на цените се ублажи во ноември, за првпат во последната година и половина, но сепак е на високи 10 отсто.

Евидентно е дека другите централни банки полека го забавуваат темпото на зголемување, па во средата американската ФЕД ја зголеми каматната стапка за 50 базични поени наместо досегашните 75, а истото тоа се очекува и од Банката на Англија в четврток.

ЕЦБ најави соопштение за новиот потег во 14.15 часот.

Растот на каматната стапка на ЕЦБ би можел да достигне 2,5 отсто / Bloomberg Mercury

Главниот економист на ЕЦБ, Филип Лејн, смета дека сега е време за малку поумерен пристап, за да не се задуши побарувачката и да ѝ се помогне на економијата да се приспособи на новите монетарни околности.

Аналитичарите сметаат дека ЕЦБ следната година би можела да ја зголеми каматната стапка до 2,5 отсто, додека на пазарот има мислења дека врвот би бил на 2,9 отсто.

Инфлацијата во еврозоната веројатно е блиску до врвот / Bloomberg Mercury

Претседателката на ЕЦБ, Кристин Лагард, денеска ќе ги објави главните принципи на програмата за намалување на портфолиото на обврзници во вредност од пет илјади милијарди евра, што ЕЦБ го акумулираше преку долгорочната програма за купување обврзници.

Во моментов нема коментари за веста. Биди прв да коментира...

Остави коментар