.webp){kind=icon}
Економијата на Обединетото Кралство може да избегне рецесија до крајот на оваа година, бидејќи потрошувачите продолжуваат да трошат, и покрај најлошото ниво на трошоците за живот што се памти. Бруто-домашниот производ (БДП) неочекувано се зголеми за 0,1 отсто во ноември, објави денеска Канцеларијата за национална статистика. Економистите очекуваа мал пад по растот во октомври.
Раст на БДП во Обединетото Кралство / Bloomberg Mercury
Податоците за ноември значат дека економијата на Обединетото Кралство веројатно избегнала рецесија во последните месеци од 2022 година. Државната статистика соопшти дека бројката на БДП во декември мора да падне за околу 0,5 отсто, за да постигне намалување во четвртиот квартал.
Бројките може да ги зајакнат повиците за понатамошно зголемување на каматните стапки, додека Банката на Англија дебатира како да ја заузди инфлацијата, која е блиску до највисоката во последните четири децении. Централната банка предвидуваше дека рецесијата веќе е во тек во втората половина на 2022 година и ќе трае до 2024 година.
„Денешните податоци, кои се подобри од очекуваното, ќе бидат охрабрувачки за бизнисите, но може да предизвикаат и претпазливата Банка на Англија да продолжи непотребно да ги зголемува стапките. Ризикот сега е дека стапките ќе се зголемат премногу“, рече Кити Ашер, главен економист на Институтот на директори.
Што велат економистите на „Блумберг“?
„Малиот пораст на БДП во ноември 2022 година ја прави мала веројатноста дека економијата паднала во рецесија на крајот од минатата година. Исто така, се чини дека сегашниот пад може да биде поплиток отколку што очекувавме. Тоа нема да биде многу важно за следната политичка одлука на Банката на Англија, бидејќи банкарите се ласерски фокусирани на инфлаторните притисоци. Меѓутоа, тоа би можело да има поголемо влијание понатаму. Ако економијата не ослабне доволно за да го залади пазарот на трудот, Банката на Англија може да биде принудена да направи многу повеќе“, вели Ана Андраде, економистка во „Блумберг“.
И покрај изненадувачкото засилување во ноември, месечниот БДП сега се проценува дека е 0,3 отсто под нивото пред коронавирусот. Економистите и централната банка предупредуваат дека притисокот на приходите ќе ја намали активноста во економијата, создавајќи на тој начин еден од најдолгите падови досега.
Движење на БДП по држави од претпандемискиот период до денес / Bloomberg Mercury
Бројките од ноември можеби помогнаа за укинување на даночното зголемување на платите, што го зголеми расположливиот доход во текот на месецот. Владата на премиерот Риши Сунак се обидува да се бори против инфлацијата и да го ублажи ударот врз потрошувачите од зголемените сметки за енергија.
„Имаме јасен план да ја преполовиме подмолната инфлација оваа година, која доведе до зголемување на каматните стапки и трошоците за заеми, што, пак, го кочи растот овде и низ светот“, рече министерот за финансии Џереми Хант.
Фудбалските натпревари на Светскиот куп ги поттикнаа некои од бизнисите и помогнаа да се ублажи влијанието од штрајковите, соопшти државната статистика. Услугите како целина пораснаа побрзо од очекуваното, поттикнати од агенциите за регрутирање, кои забележаа месечна добивка од 2,1 отсто. Тие фактори ѝ помогнаа на економијата да се соочи со падот на производството, кој е поостар од очекуваното.
Штрајковите директно ја погодија активноста во поштенската и железничката индустрија, но се прелеаја и во низа други сектори, вклучувајќи ги трговијата на големо и секторот за накит. И покрај тоа што не може да се даде точна бројка за економскиот удар од овие индустриската акции, влијанието би можело да биде поголемо во декември.
Производството во транспортниот и поштенскиот сектор се намали за 4,7 отсто и 3,1 отсто соодветно во ноември, што укажува на влијанието од штрајковите што го потресоа Обединетото Кралство.
Другите услужни сектори што забележаа силен раст вклучуваат телекомуникации и компјутерско програмирање, социјална работа и угостителство, бидејќи луѓето излегуваа да ги гледаат натпреварите од Светското првенство.
Сепак, спортските активности забележаа пад во производството, бидејќи луѓето повеќе ги гледаа натпреварите наместо да играат.
За минималниот раст на БДП помогнаа и бројките од трговијата. Трговскиот дефицит на Обединетото Кралство, не вклучувајќи ги благородните метали, се намали за 6,5 милијарди фунти (7,9 милијарди долари), на 20,2 милијарди фунти во трите месеци заклучно со ноември, откако падот на цените на енергијата го намали увозот на стоки од земјите што не се членки на ЕУ.
