Во првиот квартал годинава, сезонски приспособениот бруто-домашен производ (БДП) во еврозоната порасна за 0,1 отсто во споредба со последниот квартал лани, објави „Евростат“ во својата прелиминарна процена во петокот.
На ниво на целата Европска Унија, БДП пораснал за 0,3 отсто на квартална основа.
Во четвртиот квартал од 2022 година, БДП квартално останал на исто ниво во еврозоната, но паднал за 0,1 отсто во ЕУ.
Споредено со истиот квартал лани, растот на сезонски приспособениот БДП во првиот квартал од годинава и во еврозоната и во ЕУ изнесува 1,3 отсто.
Во претходниот квартал овој годишен раст беше 1,8 отсто во еврозоната и 1,7 отсто во ЕУ.
Движење на БДП во ЕУ и во еврозоната на квартална основа
Eurostat
Меѓу членките на ЕУ за кои досега се достапни податоци во првиот квартал, најголем раст има Португалија од 1,6 отсто, а потоа следуваат Шпанија, Италија и Летонија со 0,5 отсто. Пад на БДП е забележан во Ирска за цели 2,7 отсто и во Австрија за 0,3 отсто.
Движење на БДП во еврозоната и во ЕУ на годишно ниво
Eurostat
На годишно ниво, раст на БДП е остварен во сите земји на ЕУ, освен во Германија, каде што тој падна за 0,1 отсто.
Прелиминарните податоци се објавени само за 12 членки на ЕУ.
Поцелосни процени за економскиот раст во првиот квартал се најавени за 16 мај.
.webp){kind=icon}
