Американската економија забави, но останува отпорна

Американската економија во вториот квартал од годинава забележа раст послаб од очекуваниот, но зголемената потрошувачка на домаќинствата и силните инвестиции на компаниите покажуваат дека таа и натаму останува стабилна и отпорна на надворешните економски притисоци.

Според првата проценка на американското Биро за економски анализи, бруто домашниот производ (БДП) пораснал со годишна стапка од 1,5 отсто во периодот од април до јуни. Тоа претставува забавување во однос на почетокот на годината, делумно поради зголемениот увоз, кој негативно влијаеше врз вкупниот економски резултат.

И покрај тоа, потрошувачката на домаќинствата, која сочинува околу две третини од американската економија, пораснала за 3,2 отсто, што е повеќе од очекувањата на аналитичарите. Дополнителен поттик за економијата дадоа и инвестициите на компаниите, особено во развојот на вештачката интелигенција, каде што технолошките гиганти продолжуваат агресивно да вложуваат во нови дата-центри и современа инфраструктура.

Економистите посочуваат дека овие податоци покажуваат оти американската економија засега успешно ги амортизира последиците од војната со Иран. Иако конфликтот доведе до повисоки цени и поголема неизвесност, падот на цените на горивата кон крајот на кварталот, повисоките даночни поврати и бројните продажни акции придонесоа граѓаните да продолжат активно да трошат.

Во јуни реалната потрошувачка повторно забележа силен месечен раст, додека инфлацијата, мерена преку индексот на личната потрошувачка што Федералните резерви (Фед) го користат како главен показател, благо се намали. Основната инфлација, без храната и енергентите, исто така беше пониска од прогнозите.

Економскиот раст на САД се омекна во вториот квартал

Потрошувачката на грѓаните и деловните инвестиции беа силни Bloomberg

Инвестициите остануваат еден од главните двигатели на американскиот економски раст. Најголем придонес имаат вложувањата во индустриска и транспортна опрема, како и во информатичка технологија и софтвер, поттикнати од забрзаната примена на вештачката интелигенција (ВИ).

Откако Федералните резерви оваа недела одлучија да не ги менуваат каматните стапки, претседателот на централната банка Кевин Ворш оцени дека отпорноста на американската економија е „импресивна“, нагласувајќи дека најголемата сила во моментов се токму инвестициите на компаниите.

Од друга страна, надворешната трговија и намалените залихи на компаниите го намалија економскиот раст во вториот квартал. Дел од фирмите ги искористиле резервите создадени пред воведувањето на новите царини и за време на воениот конфликт, што дополнително влијаеше врз резултатот.

Во извештајот се наведува и дека инвестициите во станбениот сектор по подолг период повторно дале позитивен придонес за економскиот раст, иако високите хипотекарни каматни стапки и натаму ја ограничуваат побарувачката и изградбата на нови домови.

Во наредниот период неизвесноста останува висока поради состојбата на Блискиот Исток и новите царини што ги воведе претседателот Доналд Трамп. Иако Федералните резерви ги задржаа каматните стапки непроменети, тројца членови на раководството гласаа за нивно зголемување поради инфлацијата, која сè уште е над посакуваното ниво.

Сепак, повеќето економисти очекуваат потрошувачката на домаќинствата да остане стабилна во втората половина од годината, бидејќи отпуштањата се ограничени, а американските потрошувачи и натаму покажуваат изненадувачка отпорност и покрај економските предизвици.