Германската инфлација забави повеќе од очекуваното

Германската инфлација забави повеќе од очекуваното во јули, обезбедувајќи повеќе аргументи дека ценовните притисоци постепено се намалуваат во еврозоната додека Европската централна банка (ЕЦБ) се приближува кон крајот на циклусот на зголемување на каматните стапки.

Годишната стапка на инфлација изнесува 6,5 отсто, што е пад од 6,8 отсто во јуни. Тоа е помалку од просечната процена од 6,6 отсто во анкетата на „Блумберг“ меѓу економистите. Базичната инфлација, која ги исклучува трошоците за храна и енергија, исто така забави.

Податоците претходно во петокот покажаа дека растот на цените во Франција падна на пет проценти. Во Шпанија неочекувано забрза до 2,1 отсто, но остана блиску до целта на ЕЦБ од два отсто.

Податоците доаѓаат по извештајот што покажува дека најголемата европска економија не забележа расте трет квартал по ред, меѓу април и јуни, иако резултатот го означи излегувањето на Германија од зимската рецесија предизвикана од енергетската криза.

Ваквиот пејзаж на податоци би можел дополнително да ја забави инфлацијата, која паѓа бидејќи трошоците за природен гас почнаа да се намалуваат, по големиот раст што дојде по рускиот напад врз Украина. Последните податоци, сепак, беа под влијание на иницијативата на германската влада за евтин јавен превоз минатото лето.

Во еврозоната, кварталното истражување на ЕЦБ покажа дека професионалните аналитичари очекуваат посилна базична инфлација оваа и следната година отколку што се мислеше. Официјалните лица во Франкфурт ги зголемија стапките деветти пат по ред во четвртокот, а можеби ќе го сторат тоа повторно кога ќе се состанат во септември.