Бруто-домашниот производ (БДП) на Европската Унија во вториот квартал е на исто ниво како и во првиот, покажуваат најновите прелиминарни податоци на „Евростат“. БДП на еврозоната, земјите-членки што делат заедничка валута, порасна во истиот период за 0,3 отсто. Во однос на вториот квартал од минатата година, економијата на Унијата порасна за 0,5 отсто, додека економијата на еврозоната зајакна за 0,6 отсто.
Последните податоци покажуваат дека Европската Унија сè уште помалку или повеќе успешно ѝ се спротивставува на рецесијата од која се стравуваше долго време. Помеѓу поединечните земји за кои се достапни податоци, најголем квартален раст остварија Ирска, Литванија и Словенија. Во вториот квартал БДП на Ирска е повисок за 3,3 отсто од првиот, БДП на Литванија порасна за 2,8 отсто, додека растот на Словенија е 1,4 отсто. Најлошо беше во полската економија, каде што БДП се лизна за цели 3,7 отсто во вториот квартал.
На годишно ниво, Ирска и Романија забележаа најголем раст меѓу членките на Унијата, со економски скок од 2,8 односно 2,7 отсто во однос на ланскиот втор квартал, покажуваат статистиките. Заедно со нив само Португалија и Кипар лани имаа раст од над два отсто. Моторот на европската економија, Германија, во вториот квартал стагнираше, а во последната година нејзината економија забележа мал пад од 0,1 отсто.
Естонија, Шведска и Унгарија поминаа најлошо во изминатата година. Естонската економија се намали за три отсто од вториот квартал минатата година, шведската за 2,4 отсто, а унгарската за 2,3 отсто.
.webp){kind=icon}
