Германските машиновозачи стапија во шестдневен штрајк

Патниците на германските железници се соочуваат со нови шест дена немири откако мал, но влијателен синдикат на машиновозачите ги повика своите членови на штрајк по четврти пат во долготрајниот спор околу платата и работното време.

Синдикатот (Gewerkschaft Deutscher Lokomotivführer, или GDL) ја одби третата понуда од државниот железнички оператор „Дојче Бан“ (Deutsche Bahn AG) и побара од машиновозачите да престанат со работа од 18 часот по локално време во вторник. Тој ги повика и машиновозачите на патничките возови да штрајкуваат од 2 часот по полноќ во среда до 18 часот на 29 јануари.

„’Дојче Бан‘ даде „лажни понуди“ за да се обиде да ги запре напорите на синдикатот и да го „дискрредитира во очите на јавноста“, соопшти синдикатот во средата во соопштението на својата веб-страница.

Продолженото времетраење на штрајкот, по тридневниот прекин на работата претходно овој месец, го истакнува растечкото непријателство меѓу железничкиот оператор и синдикалните водачи.

Министерот за транспорт Фолкер Висинг го опиша штрајкот како „деструктивен“ и побара од двете страни да продолжат со преговорите.

Германското индустриско лоби БДИ објави дека најновиот штрајк веројатно ќе предизвика „огромни проблеми“ за компаниите – особено во секторите хемикалии, челик, автомобили, хартија и дрво – во време кога најголемата европска економија веќе се бори да излезе од период на стагнација.

„Шестдневен штрајк може да предизвика загуби до 1 милијарда евра (1,1 милијарда долари) и да предизвика „значителна штета на имиџот на железницата како начин на транспорт“, рече Тања Генер, извршен директор на БДИ, во е-пошта во средата.

„Сомнежите за доверливоста на железничката инфраструктура продолжуваат да растат и системот станува сè понеатрактивен за носителите на одлуки во логистиката“, додаде Генер. „Ова не навестува добро за напорите на климатската политика да се движат повеќе стоки со железница на одржлив начин“.

„Дојче бан“ во петокот достави трета понуда до синдикатот, предлагајќи зголемување на платите за дури 13 отсто и можност за намалување на работните недели на 37 часа од 2026 година.