Инфлацијата во Турција оди кон рекордни 70 проценти

Инфлацијата во Турција се искачи на највисоко ниво во последните 15 месеци, забрзување што внимателно го следи централната банка која сè уште е во состојба на готовност откако прекина со зголемувањето на каматните стапки. Делумно поттикнат од овогодинешното нагло зголемување на минималната плата, растот на цените во февруари се забрза четврти месец по ред од 64,9 проценти во јануари на 67,1 проценти. Прогнозата за просекот во анкетата на „Блумберг“ меѓу економистите беше 66 проценти.

Месечната инфлација - мерило што беше посебно под лупа од централната банка - се намали од 6,7 проценти во јануари на 4,5 проценти во февруари, иако останува далеку над нивото во четвртиот квартал.

„Ние сме далеку од стабилност на цените, но тоа е нашата цел“, рече турскиот министер за финансии Мехмет Шимшек во ТВ интервју за „Блумберг ХТ“ пред објавувањето на податоците.

Новите бројки се последни пред локалните избори закажани за март на кои владејачката партија на претседателот Реџеп Таип Ердоган ќе се обиде да ги врати градовите под контрола на опозицијата како Истанбул и Анкара. Полабавата фискална политика пред гласањето се појави како пречка за напорите на централната банка да ја задржи инфлацијата.

Новопоставениот гувернер Фатих Карахан, кој ја презеде функцијата по ненадејната промена на раководството на почетокот на февруари, го нарече зголемувањето на минималната плата најголем ризик за изгледите за инфлација во Турција.

Креаторите на политиката очекуваат годишната инфлација да достигне врв над 70 проценти во мај, но ги оставија стапките непроменети минатиот месец, откако испорачаа кумулативни 3.650 базични поени на затегнување во осум чекори. За прв пат, централната банка во февруари соопшти дека реалната апрецијација на лирата е клучен елемент на дезинфлацијата.

Во записникот од последниот состанок на монетарците, исто така, беше истакнато дека „силното зголемување на цените на непреработената храна“ е главен двигател на растот на цените.

Во моментов нема коментари за веста. Биди прв да коментира...

Остави коментар