ЕЦБ ги задржа стапките непроменети, послабата инфлација навестува намалување

Европската централна банка ги задржа каматните стапки непроменети на четврти состанок по ред, додека послабите изгледи за инфлацијата и економскиот раст ги потхрануваат очекувањата за намалувања што треба да започнат во јуни.

Стапката на депозитите се задржа на рекордни 4 отсто - како што предвидуваа сите економисти анкетирани од „Блумберг“. Управниот совет повтори дека одржувањето на ова ниво на трошоци за задолжување „доволно долго“ ќе даде „значителен придонес“ за враќање на растот на потрошувачките цени на целта од 2 отсто.

„Управниот совет ќе продолжи да го одржува пристапот што ги следи податоците за да може да се одредат соодветното ниво и времетраење на ограничувањето“, се наведува во соопштението на ЕЦБ. „Иако повеќето мерки за базичната инфлација дополнително се намалија, домашните ценовни притисоци остануваат високи, делумно поради силниот раст на платите“.

Еврото се лизна по одлуката, тргувајќи се со пад од 0,2 отсто, на 1,0874 долари. Трговците додадоа на облозите за монетарно олеснување, со 98 базични поени на намалување на стапката во 2024 година во споредба со околу 93 базични поени претходно.

ЕЦБ, како и Федералните резерви (Фед) и Банката на Англија (БоЕ), размислува кога да започне со намалување на невиденото монетарно затегнување што беше употребено за да се заузда инфлацијата. Додека растот на цените во 20-члената еврозона се приближува кон целта, тамошните креатори на политики се претпазливи во однос на прерано намалувањето и сакаат да се уверат дека зголемувањето на платите е под контрола.

ЕЦБ ги намали проекциите за инфлацијата Bloomberg

Нивната последна квартална прогноза ја позиционира инфлацијата на 2,3 отсто годинава - помалку од 2,7 отсто во декември - и ја ревидира прогнозата за 2025 година на 2 отсто. Покрај тоа, се очекува економијата да се зголеми за 0,6 отсто во 2024 година наспроти 0,8 отсто претходно.

Претседателката Кристин Лагард ќе одржи прес-конференција во Франкфурт, при што инвеститорите во нејзиниот говор ќе бараат сигнали за тоа дали очекувањата за првото намалување на стапката во јуни остануваат валидни. 

Јуни е секако временската рамка околу која се приближија мнозинството функционери - дури и ако некои би сакале побрза акција, додека економијата на континентот се бори да излезе од повеќе од едногодишна стагнација.

Поради таа причина, многу политичари исто така копнеат за полабави финансиски услови. „Намалувањето на стапките може да помогне во зајакнувањето на растот, кој е низок низ Европа“, рече италијанскиот министер за финансии Џанкарло Џорџети минатата недела. „Мислам дека не сум единствениот што го дели овој став“.

Додека креаторите на политиката се посигурни дека инфлацијата значително се намалува, повеќето сметаат дека е прерано да се прогласи победа и сакаат да видат повеќе податоци што го поддржуваат повлекувањето, пред да дадат зелено светло за монетарно олабавување.

Февруарската инфлација, од 2,6 отсто, беше малку посилна од очекуваното - поддржувајќи ги оние што не сакаат да брзаат со намалување на стапките. Меѓутоа Наукаст (Nowcast), составен од „Блумберг економикс“, ја позиционира мартовската инфлација на ниво од 2 отсто - што сугерира дека ЕЦБ е поблиску до својата цел отколку што веројатно мисли.

Без оглед на реалноста, повеќето креатори на политики се заинтересирани да ги видат податоците за платите што треба достасаат во текот на следните месеци пред да дејствуваат. Меѓу нив е и Гркот Јанис Стурнарас, кој неодамна рече дека ЕЦБ „нема да има доволно информации“ за да одлучи за кратењата пред јуни.

Во моментов нема коментари за веста. Биди прв да коментира...

Остави коментар