Претставници на ЕЦБ поддржуваат намалување во јуни, но некои се отворени и за април

Се создава погоден момент за намалување на каматните стапки во јуни, што во четвртокот го означи и претседателката на Европската централна банка (ЕЦБ), Кристин Лагард.

Говорејќи еден ден откако таа нагласи дека се потребни дополнителни податоци пред да започне монетарното олеснување и дека „многу повеќе ќе се знае во јуни“, креаторите на политиката ја повторија таа перспектива. Сепак, неколкумина предложија дека побрз потег во април не треба целосно да се исклучи.

„Гулаби“ и „јастреби“ во политиката на ЕЦБ Bloomberg

Еве што рекоа:

Јоаким Нагел, Германија

„Се зголемува веројатноста дека би можеле да видиме намалување на каматите пред летната пауза“.

„Тоа ќе зависи од податоците, но изгледите се подобрија“.

Нагел го поздрави тоа што пазарите стануваат поусогласени во однос на јуни како соодветен момент за да се започне со намалување на трошоците за задолжување.

Франсоа Вилерој де Галхау, Франција

„Се чини многу веројатно дека ќе има прво намалување на стапката напролет“.

„Пролетта завршува на 21 јуни“.

„Имаме сè поголема доверба дека инфлацијата ќе се врати на 2 отсто од сега до следната година“.

Оли Рен, Финска

„Моја сопствена процена е дека врз основа на прогнозата што сега е добиена, ризиците од предвремено намалување на каматните стапки во однос на контролата на инфлацијата се значително намалени - на тоа влијае и намалувањето на прогнозата за раст. Ќе се вратиме на ова прашање на претстојните состаноци во април и јуни врз основа на најновите информации“.  

„Исто така, во дискусијата имаше и мислења дека ЕЦБ не може да ги намали каматните стапки пред Фед, американската централна банка. Таквите гласини се претерани: ЕЦБ не е 13-ти федерален округ на Фед“.

Мадис Мулер, Естонија

Инфлацијата во еврозоната постепено се приближува до целта од 2 отсто, но на функционерите сè уште им е потребна поголема доверба дека трендот ќе продолжи.

На ЕЦБ сè уште ѝ треба „поцврста потврда дека трендот на паѓање на цените ќе продолжи пред да започне со намалување на каматните стапки“.

Креаторите на политиките исто така внимателно го следат „силното зголемување на просечните плати во еврозоната“.

Зголемувањето на платите од близу 5 отсто би го отежнало забавувањето на инфлацијата...

Гедиминас Симкус, Литванија

„Јуни е можен месец за намалување на стапката“.

„На секој состанок одам со отворен ум. Не можам да ја исклучам можноста за намалување во април, но веројатноста е мала“.

Може да има неколку намалувања годинава, но денеска не можеме да кажеме каде ќе заврши процесот на олеснување.

„Не брзаме. Не гледам зошто намалувањата треба да бидат поголеми од 25 базични поени или зошто не може да се совпаднат со објавените прогнози“.

„Има основа да почнеме да размислуваме за помалку рестриктивна монетарна политика“.

Мартинс Казакс, Латвија

„Првиот потег ќе биде важен, бидејќи тоа ќе покаже дека го менуваме патот“.

„Но, според мене, тоа не значи дека сме принудени или обврзани да намалуваме на секој состанок“.

„Опциите се секогаш тука“, додаде тој. „Ништо не ставаме на автопилот“.

„Се чини дека растот на платите малку се намалува“.

Боштјан Васле, Словенија

„Оценуваме дека сегашното ниво на каматни стапки, доколку се одржува доволно долго, значително ќе придонесе за навремено враќање на инфлацијата на целното ниво“.

„Нашите понатамошни чекори ќе продолжат да зависат од моменталната ситуација, односно од економските и финансиските податоци, движењето на базичната инфлација и ефективноста на нашите мерки“.

Во моментов нема коментари за веста. Биди прв да коментира...

Остави коментар