Холцман од ЕЦБ: Ако кратиме во јуни, се надеваме дека Фед ќе нè следи

Европската централна банка (ЕЦБ) може да започне со намалување на каматните стапки во јуни. „Имено, инфлацијата падна побрзо од очекуваното, но многу ќе зависи и од Фед“, изјави Роберт Холцман од ЕЦБ.

Инфлацијата во еврозоната опадна во текот на изминатата година, додека економскиот раст заглави, што ги наметнува прашањата за тоа колку брзо и до колку далеку ЕЦБ може да ги намали каматните стапки.

„Сигурно нема да има намалување во април“, изјави Холцман за „Ројтерс“, додавајќи: „Ќе имаме повеќе информации во јуни“.

„Доколку податоците дозволат, ќе се донесе таква одлука“, најави Холцман, кој важи за еден од најконзервативните членови на ЕЦБ. „Во принцип не сум против намалување на каматните стапки во јуни, но би сакал прво да ги видам податоците, бидејќи следните чекори зависат исклучиво од нив“.

ЕЦБ треба да биде дополнително внимателна, особено во однос на Фед

Притоа, тој предупреди дека ако американската централна банка не го следи намалувањето на каматните стапки на ЕЦБ во јуни, одговорот на пазарот во контекст на различноста во политиката ќе ја поништи големата корист од намалувањето на ЕЦБ, така што Европската централна банка треба да биде особено внимателна доколку тоа го прави сама.

Како што објасни австрискиот гувернер, ЕЦБ има состанок една недела пред Фед. „Доколку податоците дозволуваат, многу е веројатно дека ќе го направиме тоа, со надеж дека тоа ќе го направи и Фед“, рече Холцман, појаснувајќи дека растот на платите секако останува ризик за инфлацијата.

Како што додаде тој, еврозоната е во полоша конкурентна позиција поради повисоките цени на енергијата и трговските ограничувања на поголемиот дел од нејзината источна граница, така што се соочува со помали изгледи за раст од многу други валутни зони.

Во моментов нема коментари за веста. Биди прв да коментира...

Остави коментар