ББА-анализа: ЕЦБ ќе ги намалува каматите четири пати годинава

Не очекуваме Европска централна банка (ЕЦБ) да ги намали каматните стапки на состанокот неделава, но очекуваме појасен наратив во однос на тоа кога ќе ги намалат каматните стапки. Моменталните изгледи се дека тоа ќе биде јунската седница, па фокусот се префрла на интензитетот на намалувањето до крајот на годината. Тоа е сепак далеку, бидејќи доколку инфлацијата продолжи да забавува и нема изненадувања, очекуваме четири намалувања на каматните стапки во чекори од 0,25 процентни поени до крајот на годината, што веќе значително би ја намалило рестриктивноста на монетарната политика на ЕЦБ, а и товарот на каматните стапки врз економијата.

Според последното истражување за кредитната активност, и понатаму има послаба побарувачка за кредити од банките, што укажува дека побарувачката од кредитниот канал се држи под контрола. Инфлацијата во еврозоната се движи кон целта од 2 отсто и во март, според процените, беше на ниво од 2,4 проценти, веќе шест месеци по ред под 3 отсто, што ја охрабрува ЕЦБ подиректно да комуницира за следните чекори.

Bloomberg

Пазарот на трудот е затегнат, па притисоците врз платите овозможуваат нешто поголема постојаност во основните категории на инфлација - како што се услугите што се трудоинтензивни и чија инфлација не паднала под 4 отсто од ноември.

Bloomberg

Тоа се и факторите што моментално ги ограничуваат активностите на ЕЦБ и бараат претпазливост при одлучувањето и во самата комуникација.

Темпото на раст на платите забави во четвртиот квартал на 2023 година, а податоците за растот на платите за првиот квартал од 2024 година ќе бидат достапни до јунската сесија на ЕЦБ, што ќе го искристализира потегот на централната банка.