.webp){kind=icon}
Енергетската криза, која влијаеше на растот на инфлацијата, каматните стапки и економското забавување, сè уште се одразува лошо на европската економија. И покрај првото намалување на каматните стапки од страна на Европската централна банка (ЕЦБ) во јуни, податоците на „Евростат“ покажуваат дека бројот на банкротирани компании во Европската Унија (ЕУ) продолжува да расте, додека бројот на нови се намалува.
Во извештајот на „Евростат“ се наведува дека во вториот квартал од годинава бројот на прогласен стечај на компании во ЕУ е зголемен за 3,1 отсто во однос на првиот квартал од 2024 година. Истовремено, регистрациите на фирмите се намалени за 2,1 отсто. Сегашниот број на корпоративни стечајци е најголем во последните неколку години.
Евростат
Високите цени на струјата и гасот продолжуваат да ги оптоваруваат компаниите, а уште еден дополнителен проблем е што задолжувањето веќе не е евтино.
Податоците покажуваат дека е намален бројот на регистрации на фирми во сите сектори во економијата. Во однос на претходниот квартал, најголем пад во вториот квартал од 2024 година има во трговијата (-4,7 отсто), индустријата (-3,6 отсто) и образованието и социјалните дејности (-3,4 отсто). Најмал пад е забележан кај финансиските активности (-0,7 отсто).
Додека се зголемуваше вкупниот број на стечајци, одделни сектори во економијата се однесуваа поинаку. Споредено со претходниот квартал, во вториот квартал од годинава се намалени стечајците во четири сектори: информации и комуникации (-4,8 отсто), транспорт (-1,6 отсто), услуги за сместување и храна (-1,1 отсто) и образование и социјални дејности ( -1 процент).
Од друга страна, зголемен е бројот на пријави за стечај во четири други сектори: градежништво (+3,8 отсто), финансиски дејности (+2,6 отсто), трговија (+2,4 отсто) и индустрија (+1,6 отсто).
