Казакс од ЕЦБ предвидува намалување на стапките и овој месец

Европската централна банка (ЕЦБ) најверојатно ќе ги намали трошоците за задолжување месецов и ќе продолжи да ги намалува и подоцна, изјави членот на Управниот совет на ЕЦБ, Мартинс Казакс. Тој додава дека некои од инвеститорите и економистите сè уште имаат нереални очекувања.

„Ќе разговараме и ќе одлучиме за тоа кога ќе се состанеме, а дотогаш ќе добиеме повеќе информации. Сепак, последните податоци покажуваат дека треба да размислуваме за намалување на стапките“, рече летонскиот централен банкар во интервју во Рига. „Ризиците за економскиот раст се поизразени“, додаде банкарот.

Иако смета дека каматите ќе продолжат да паѓаат и по октомври, тој рече дека сепак е преоптимистички да се очекува драстичен пад на стапките.

„Би ги предупредил пазарите да не трчаат пред рудата во однос на економската состојба како што направија на крајот на минатата година“, рече Казакс.

Коментарите на Казакс се првите пораки од банкарот со поагресивен став, бидејќи лошите податоци за економскиот раст и извештајот за инфлацијата ги убедија пазарите дека ЕЦБ ќе реагира побрзо отколку што се мислеше. Пазарите на пари сега проценуваат дека шансите за намалување во октомври се околу 90 отсто.

Bloomberg

На ова во понеделникот укажа и претседателката на ЕЦБ, Кристин Лагард. Таа рече дека централните банкари при донесување одлука ќе го земат предвид и оптимизмот во однос на постигнувањето на целта за инфлацијата. Во септември растот на цените забави под два отсто, што е целта на централната банка. Ова е прв ваков месец од 2021 година.

И покрај ваквиот тренд на инфлацијата и растот на платите, Казакс мисли дека нема потреба од брзање и прогласување победа. „Прерано е да се каже дека сме се справиле со инфлацијата. Каматните стапки сепак треба да останат малку рестриктивни, а такви ќе останат и по дополнителното намалување на трошоците за задолжување“, вели банкарот.

Во однос на економијата тој вели дека загрижува забавувањето на растот и додава дека особено го загрижува влошувањето на пазарот на трудот.

„Ризикуваме да дојдеме до точка каде што некои компании ќе почнат да отпуштаат работници бидејќи закрепнувањето не дојде доволно брзо“, рече Казакс. „Тогаш може да има ефект на лавина“, додаде тој.

Иако каматните стапки ќе продолжат да паѓаат по октомври, треба да се биде претпазлив поради факторите како изборите во САД и геополитичките тензии, според банкарот.

„Бидејќи е неизвесно како ќе се развиваат работите понатаму, би било неблагодарно да се даваат попрецизни најави за понатамошни потези“, вели Казакс. „Што се однесува до декемвриската средба, треба да почекаме и да видиме каква ќе биде ситуацијата тогаш“, заклучи тој.

Во моментов нема коментари за веста. Биди прв да коментира...

Остави коментар