Инфлацијата во еврозоната падна под 2 отсто за првпат од 2021 година

Инфлацијата во еврозоната се намали под целта на Европската централна банка (ЕЦБ) од 2 отсто за првпат од 2021 година - што ја зајакнува довербата на инвеститорите дека каматните стапки може да се намалат побрзо од очекуваното.

Потрошувачките цени се зголемија за 1,8 отсто во септември во споредба со претходната година, што е пад од 2,2 отсто во претходниот месец, додека енергетските трошоци значително опаднаа, објави „Евростат“ во вторникот. Овој резултат се совпадна со истражувањето на „Блумберг“ (Bloomberg), како и основната инфлација, која се намали на 2,7 отсто.

Овие податоци ќе ја зајакнат растечката увереност кај инвеститорите дека ЕЦБ ќе мора да ја олабави монетарната политика побрзо за да одговори на економијата што забавува и неочекувано брзата дезинфлација.

Претседателката Кристин Лагард го навести ова во понеделникот, кажувајќи им на пратениците во Европската Унија дека официјалните лица ќе го земат предвид зголемениот оптимизам околу потрошувачките цени при нивната следна одлука на 17 октомври.

Еврото се тргуваше пониско за 0,2 отсто, на околу 1,1109 долар, отстапувајќи од речиси двегодишниот максимум. Пазарите на пари сега гледаат речиси 90 отсто шанси дека месецов ќе донесе трето намалување на каматните стапки годинава.

Се очекува уште едно намалување од четвртина поен кога креаторите на политиката ќе се состанат во декември, последен пат за 2024 година. Тоа би ја намалило депозитната стапка на 3 од тековните 3,5 отсто.

Побрзо олабавување на монетарната политика започна да се предвидува откако деловните анкети од „Ес енд Пи глобал“ (S&P Global) минатата недела неочекувано покажаа дека економијата на еврозоната се намалила во септември, со ослабена побарувачка и намалување на ценовните притисоци. Дополнително на тоа, националните податоци од Германија, Франција и од Шпанија покажаа дека инфлацијата се намалила под 2 отсто.

Инфлацијата падна под 2 отсто во повеќе од половина земји од еврозоната

Bloomberg

Меѓутоа, главните бројки се под влијание на нестабилните енергетски трошоци и веројатно повторно ќе се зголемат до крајот на годината. А другите мерки остануваат тврдокорно високи.

Инфлацијата во секторот услуги - метрика на која се фокусираат официјалните лица за да ја утврдат јачината на домашните ценовни притисоци - се намали само на 4 отсто во септември од 4,1 отсто претходниот месец.

Растот на платите, главен двигател на трошоците за услуги, беше упорен, но почна да се намалува. Главниот економист на ЕЦБ, Филип Лејн, очекува дека овој тренд ќе продолжи откако платите на работниците ќе го надоместат губењето на куповната моќ забележано во изминатите години.

Лагард ги призна овие ситуации во својот говор, велејќи: „Имаме причини да веруваме дека инфлацијата во секторот услуги исто така почнува да се намалува, бавно и постепено, така што се движиме кон тој правец на намалена инфлација“.

Што велат од „Блумберг економикс“...

 „Изгледа дека основниот притисок на трошоците опаѓа. Инфлацијата ќе порасне во следните месеци поради базичните ефекти, но пошироката перспектива укажува на широкораспространета дезинфлација“.

-  Џејми Раш, главен економист за Европа

Во меѓувреме, загриженоста за економијата се зголемува - главно поради сè полошите перспективи за германскиот производствен сектор. Владата во Берлин се подготвува да ја намали прогнозата за економскиот раст за годинава, очекувајќи стагнација во најдобар случај, по целогодишна контракција во 2023 година.

Тоа го влоши расположението меѓу потрошувачите, кои и натаму се неодлучни да трошат, иако имаат корист од пониската инфлација и растот на приходите.

Спротивните ветрови на економскиот раст „значат дека сè уште не можам да кажам дека е обезбедено таканареченото меко приземјување“, изјави во вторникот шефот на финската централна банка Оли Рен. „Ова треба да се земе предвид при идните одлуки за монетарната политика, без да се загрози стабилноста на цените“.

Во моментов нема коментари за веста. Биди прв да коментира...

Остави коментар