.webp){kind=icon}
Еврозоната неочекувано забележа пад на деловната активност, што е знак за штетата предизвикана од политичкиот хаос и зголемените несогласувања околу трговијата.
Композитниот индекс на менаџери за набавка (PMI) на „Ес енд Пи глобал“ (S&P Global) се намали на 48,1 од 50 во октомври, повторно паѓајќи под нивото што го одделува растот од контракцијата. Аналитичарите очекуваа дека нема да има промени и беа особено изненадени од големото влошување во секторот на услуги, каде што активноста падна за првпат од јануари.
Еврото падна на најниски нивоа од 2022 година во однос на доларот, бидејќи трговците ги вклучија во цените дополнителните намалувања на каматните стапки од Европската централна банка. Шансата за намалување од 50 базични поени во декември се зголеми на 50 отсто од околу 15 отсто на затворањето во четвртокот.
„Работите тешко дека можеа да излезат полошо“, наведе во изјава Сајрус де ла Рубија, главен економист во Хамбуршката комерцијална банка (Hamburg Commercial Bank). „Производствениот сектор на еврозоната тоне подлабоко во рецесија, а сега и секторот на услуги почнува да се бори по два месеца маргинален раст“.
Bloomberg
Овие бројки ќе ја зголемат загриженоста за перспективите на европската економија, која веќе е под закана поради колапсот на германската влада, фискалните проблеми на Франција и трговските тарифи што би можеле да следуваат откако Доналд Трамп ќе се врати на претседателската функција во САД.
„Не изгледа дека закрепнувањето ќе дојде наскоро, бидејќи и новите нарачки и заостанатите нарачки паднаа уште побрзо отколку во октомври“, рече Де ла Рубија. Тој ја истакнува разочарувачката потрошувачка - и покрај намалувањето на инфлацијата и зголемувањето на платите.
Иако бруто-домашниот производ ги надмина очекувањата во третиот квартал и во голема мера ги намали облозите за поголеми намалувања на каматните стапки од ЕЦБ, новите податоци ги оживуваат таквите облози. Во септември, изненадувачки слабата почетна бројка PMI беше клучна причина за забрзувањето на кампањата за олеснување на ЕЦБ, дури и ако бројката подоцна беше значително ревидирана нагоре.
„Прашањето е колку сериозно ќе се сфати овој сигнал“, посочија од ИНГ (ING) во белешка до клиентите. „На ум доаѓа приказната за момчето што викало 'волк'. Но не лажете се, основната порака е во согласност со значителното забавување на растот на БДП. Очекуваме четвртиот квартал да покаже стагнација“.
ЕЦБ треба да ја намалува својата депозитна стапка на секој состанок додека не достигне два отсто, според членот на Управниот совет Јанис Стурнарас. Засега, намалувањето од четвртина поен на 12 декември е „правилниот одговор“, изјави тој за телевизијата „Блумберг“ во четвртокот, без да исклучи поголем чекор.
Стурнарас е меѓу групата гувернери што се грижат дека послабата економија може да резултира со инфлација под целта од два отсто. Други, пак, предупредуваат на сè уште високите домашни ценовни притисоци, главно во секторот услуги.
Според „Ес енд Пи глобал“, влезните и излезните цени се зголемија побрзо во ноември, поттикнати од трошоците за услуги. Тоа е „голема главоболка за ЕЦБ“, рече Де ла Рубија.
