Ризикот од рецесија во еврозоната го достигна највисокото ниво од ноември 2020 година, бидејќи недостигот од енергија се заканува дополнително да го подигне веќе рекордното ниво на инфлација, велат експертите кои ги анкетираше Блумберг.
Можноста за намалување на производството веќе два квартали по ред порасна на 60 проценти откако претходните истражувања покажуваа 45 отсто шанси за такво нешто. Истиот параметар изнесуваше 20 проценти пред почетокот на војната во Украина. Германија, како најсилна економија во блокот и една од најизложените на намалување на испораката на рускиот природен гас, веројатно уште во овој квартал ќе стагнира.
Растот на цените на потребите за живот штети како на компаниите, така и на домаќинствата во еврозоната, а енергетската закана од Русија во текот на последните месеци уште повеќе го влошува тој проблем. Пред тоа, пак, сериозните суши кои доведоа до пад на нивото на водата ширум Европа создаде т.н. тесни грла во снабдувањето со стоки.
Сега се очекува инфлацијата во просек да изнесува скоро 8 отсто во 2022 година, што е за околу четири пати повеќе од целта на Европската централна банка. За следната година очекувањата се инфлацијата да изнесува 4 проценти. Анкетираните експерти очекуваат растот на цените да продолжи да забавува и предвидуваат дека целта од 2 проценти инфлација ќе се достигне дури во 2024 година.
Економистите прогнозираат дека Европската централна банка во септември ќе ја зголеми каматната стапка за половина процент, исто како што веќе направи во јули.
.webp){kind=icon}
