Германските домаќинства годишно за гасот би можеле дополнително да плаќаат и до 500 евра. Ова е обид на власта трошокот од рускиот притисок врз енергетските пазари да го подели на целото општетство.
Од почетокот на октомври потрошувачите ќе мора да плаќаат дополнителни 2,419 евроценти по киловат час за гас, објавија власите вчера. Ударот од оваа привремена давачка за некои домаќинства ќе биде ублажен со субвенции.
„Давачката е последица на нелегалната војна на Путин против Украина и вештачкиот недостиг на енергија кој го предизвика Русија“, соопшти Роберт Хабек, германски министер за економија. „Неопходно е да се одржи испораката на топлина и енергија до приватните домаќинства и економијата. Во спротивно ќе биде загрозена сигурноста во снабдувањето“, додаде тој.
Намалување на потрошувачката
Дополнителната давачка доаѓа во момент кога Европа се фокусира на намалување на потрошувачката за да се олесни борбата со се полошата енергетска криза. Цените на енергијата во Германија достигнаа рекордни нивоа заради се посилната загриженост дека регионот би можел да има проблеми со производството на доволни количини струја во текот на зимата. Таквата загриженост ја поттикна инфлацијата и претставува закана за индустриското производство.
Комуналните претпријатија од почетокот на четвртиот квартал дополнителниот трошок за намалената испорака од страна на Русија ќе смеат да го префрлат на крајните купувачи. Германија досега се обидуваше да избегне ситуација во која товарот од зголемените трошоци за енергија ќе падне на крајните потрошувачи. Но, властите стравуваат дека Москва би можела целосно да ја сопре испораката на гас.
Новата давачка, најверојатно, ќе резултира со забрзување на инфлацијата во Германија, стои во анализата на Комерцбанката објавена вчера. Банката проценува дека стапката на инфлација до крајот на годината би можела да порасне значително над нивото од девет отсто. Потрошувачките цени во најголемата европска економија во јули биле за 8,5 отсто повисоки од лани.
Исклучок од новата давачка
Дел од потрошувачите ќе имаат право на субвенции за трошоците за греење, изјави Хабек. Германскиот министер за финансии, Кристијан Линднер, исто така, најави дека ќе ја разгледа можноста давачката да биде одземена од данокот на промет за делумно да биде олеснет товарот за граѓаните.
Новата давачка е последица на законот кој стапи на сила пред една недела и со неа се излегува во пресрет на комуналните претпријтија кои се приморани да купуваат поскап гас на пазарите. Нивните трошоци се драстично зголемени откако Москва ја намали испораката кон Европа низ гасоводот Северен Тек.
Унипер, најголемиот германски купувач на руски гас, смета на парите од давачката за делумно да ја освежи финансиската слика, откако претходно компанијата беше приморана да ја замоли државата за спасоносна интервенција. Енергетските компании веќе некое време бараат од државата дозвола да ги зголемат цените за потрошувачите за да се избегне домино ефектот на целиот сектор.
Политички приоритети
„Со ова, сите потрошувачи можат да ги поднесат трошоците предизвикани од војната на Путин“, вели Тим Келер, претседател на Здружението на индустријата за гас, Цукунфт. „Трговците со гас во моментов се под висок притисок во обид да ја гарантитраат испораката на гас до своите купувачи, но без правила за прилагодување на цените постои ризик од несолвентност со силни последици за целиот сектор“, дофдава Келер.
Увозниците на гас кои се погодени од намалувањето на количините имаат право на финансиска компензација за дел од дополнителниот трошок за наоѓање нови снабдувачи, со услов договорите да се склучени после 01 мај.
Намалувањето на потрошувачката на гас ќе покаже дали Европа е во состојба да ја преживее зимата. Поттикнувањата за наламување на трошењето сега е европски политички приоритет.
Германските склаидша со гас се пополнети 76 отсто, покажуваат податоците на Сојузната агенција за мрежи.
.webp){kind=icon}
