Германија штеди енергенси преку евтин јавен превоз

Експериментот на Германија, каде во период од три месеци беа пуштени многу евтини билети за јавен превоз, ја намали емисијата на јаглероден диоксид, еквивалентни количини колку за снабдување со енергенси за 350.000 домаќинства годишно.

Воведувањето на месечната карта, која чини само 9 евра и со која што беше дозволено патување во сите возови, метроа, трамваи и автобуси низ државата, спречи емисија на 1,8 милиони тони CO2 со тоа што патниците помалку ги користеа своите автомобили, а повеќе патуваа со јавен превоз.

Картата за превоз, која што се воведе во јуни и истекува на крајот од месецов, би требало да помогне во ублажување на ударот од инфлацијата во најголемата европска економија во услови кога растат цените на енергенсите и горивата поради војната во Украина. Иако постои загриженост во однос на финансирањето на картата и притисокот врз транспортната мрежа, сепак дел од германските политичари се залагаат да продолжи субвенционирањето во неколку форми.

„Мора да пронајдеме одржливо решение за да продолжиме со помошта за граѓаните преку евтин транспорт ширум земјава, бидејќи за нив е многу значајно тоа во услови на континуиран раст на цените и трошоците“, изјави Петра Берг, министерка за животна средина и транспорт во Саарланд, Западна Германија.

Инаку, се продадоа околу 52 милиони од картите за јавен превоз, а анализите покажуваат дека најмалку 10 отсто од граѓаните во тој период се откажале од возење автомобили.